26 мая ў парафіі Перамянення Пана ў Негарэлым (Стаўбцоўскі дэканат) маладыя мясцовыя вернікі адзначылі гадавіну Першай Камуніі.
Так атрымалася, што ў невялічкай каталіцкай супольнасці пасёлка ў «дачнай» мясцовасці непадалёк ад Мінска сёлета не было кандыдатаў да Першай святой Камуніі. Аднак вернікі з Негарэлага і ваколіц разам са сваім пробашчам кс. Дзянісам Шастаковічам MSF вырашылі ўрачыста адзначыць гадавіны Першай Камуніі ўсіх тых, хто раней прымаў яе ў тутэйшым касцёле, асвячаным амаль тры гады таму.
Маладыя вернікі, якія летась і ў папярэднія гады ўпершыню прынялі Езуса ў сваё сэрца, дзяліліся талентамі, атрыманымі ад Пана, і разам з бацькамі шчыра дзякавалі за шматлікія Божыя ласкі.
Падчас урачыстасці прагучалі таксама сведчанні старэйшых людзей, якія падзяліліся ўспамінамі пра сваю Першую Камунію.
Хоць негарэльская парафія і невялікая, але Пан так узнагародзіў мясцовых дзяцей і моладзь талентамі, што ў гадавіну Першай святой Камуніі яны зладзілі тут сапраўдны канцэрт на хвалу Бога.
