12 мая ў санктуарыі Гродзенскай дыяцэзіі Маці Божай Каралевы нашых сем’яў у Тракелях адбылося падвядзенне вынікаў конкурсу творчых прац у гонар Маці Божай Тракельскай.
На пачатку перад цудатворным абразом Маці Божай біскуп Гродзенскі Аляксандр Кашкевіч узначаліў цэлебрацыю святой Імшы ў інтэнцыі ўсіх удзельнікаў конкурсу, якія бралі ўдзел у гэтай Эўхарыстыі разам з вернікамі тракельскай парафіі. У супольнай малітве яны зноў прысвяцілі сваё жыццё Маці Божай, просячы ў Нябеснай Матулі патрэбных ласкаў на кожны дзень зямнога вандравання, што вядзе да Яе Сына.
Як паведамляе партал Grodnensis.by, пасля Імшы кожны з удзельнікаў конкурсу прадставіў сваю працу.
Гэта — больш за 30 вершаў i песень, малюнкі i відэаролікі, успаміны з пілігрымак і іншыя творчыя працы на тэму: «Маці Божая Тракельская, вядзі нас за сабой».
Варта адзначыць, што працы на конкурс прадставілі вернікі з усіх дыяцэзій Беларусі.
Свае творы Апякунцы нашых сем’яў прысвяцілі людзі рознага ўзросту, аматары паэзіі і прафесіяналы, свецкія і духоўныя асобы. У сваіх вершах удзельнікі дзяліліся перажываннем сваёй веры або апавядалі пра навяртанне, якім удзячныя Маці Божай.
Біскуп Аляксандр Кашкевіч, звяртаючыся да ўдзельнікаў, між іншым, адзначыў:
«Гэты конкурс з’яднаў людзей з сэрцамі, чулымі на дабро, прыгажосць, а таксама вялікую любоў да Найсвяцейшай Маці.
<…> Кожнае сэрца мае сваю гісторыю, якой прагне дзяліцца з іншымі людзьмі», — дадаў іерарх.
Пастыр Гродзенскай дыяцэзіі падзякаваў кусташу санктуарыя кс. Юрыю Бяганскаму за гэтую ініцыятыву, якая, па словах біскупа, паспрыяе развіццю культу Маці Божай Тракельскай і ўзрастанню веры ў людзях.
Па выніках конкурсу кс. Юрый Бяганскі напісаў на старонцы санктуарыя ў сацыяльнай сетцы «Вконтакте»:
«Чатыры месяцы з усіх куткоў Беларусі прыходзілі нам лісты з творчымі работамi. Таленты нашых землякоў радавалі і здзіўлялі.
Але, на жаль, правілы конкурсу такія, што даводзіцца выбіраць пераможцаў…»
Перад журы, такім чынам, стаяла нялёгкая задача па вызначэнні найлепшых працаў. Кожная з іх была па-свойму прыгожай, бо ўтрымлівала шчырыя перажыванні кожнага чалавека і вельмі часта апавядала пра яго асабісты шлях да Пана.
«Хочам у чарговы раз выказаць словы падзякі кожнаму ўдзельніку! Маці Божая Тракельская жыве ў нашых сэрцах, і ваша творчасць таму прыклад!» — сцвярджае кусташ санктуарыя Маці Божай Каралевы нашых сем’яў у Тракелях.
