31 сакавіка ў парафіі св. Тэрэзы Авільскай у Шчучыне ўпершыню з’явіліся цырымоніймайстры, а таксама былі прызначаны дзесяць новых міністрантаў.
У чацвёртую нядзелю Вялікага посту — нядзелю Радасці — шчучынская парафія таксама перажывала сваю радасць. У гэты дзень дзесяць новых міністрантаў узбагацілі тутэйшую Літургічную службу алтара і ў першы раз у жыцці апранулі белыя комжы.
Да гэтай урачыстасці кандыдаты рыхтаваліся з верасня мінулага года. Каб праверыць, наколькі яны падрыхтаваныя да службы пры алтары, быў загадзя праведзены тэарэтычны і практычны экзамен, які ўчарашнія кандыдаты паспяхова вытрымалі.
Упершыню ў парафіяльнай супольнасці з’явіліся таксама чатыры цырымоніймайстры.
Знешнім знакам іх літургічнай функцыі стала белая лектарская альба, якую яны цяпер маюць права апранаць на св. Імшу.
