30 сакавіка моладзь Магілёўскага рэгіёна сабралася на велікапоснае чуванне ў бабруйскім касцёле Беззаганнага Зачацця Найсвяцейшай Панны Марыі. Тэмай сустрэчы стала Божая Міласэрнасць.
Усяго ў чуванні ўзялі ўдзел некалькі дзясяткаў юнакоў і дзяўчат з розных парафій Магілёўшчыны. Ім дапамагалі наблізіцца да Бога кс. Юзаф Сярпейка і сястра Вера з Магілёва, айцец Натанаэль і сястра Дамініка з Асіповічаў. Разам з моладдзю разважалі і маліліся кс. канонік Андрэй Яркавец, пробашч парафіі ў Бабруйску, сёстры св. Дамініка, якія тут працуюць, кс. Канстанцін Карака, пробашч глускай парафіі, кс. Андрэй Далянскі з Касцюковічаў і іншыя.
Распачалося чуванне з адарацыі Найсвяцейшага Сакрамэнту, якую правяла моладзь з Магілёва.
Духоўнае настаўленне для юнакоў і дзяўчат падрыхтаваў кс. Андрэй Далянскі. З яго дапамогай маладыя людзі разважалі пра Божую Міласэрнасць, пра тое, як яна аб’яўляецца ў Старым і ў Новым Завпавеце.
Святар распавёў, якім чынам добры Бог вёў чалавецтва ад першароднага граху да запаведзяў любові, а таксама прапанаваў паразважаць над тым, якім чынам сучасныя людзі могуць стаць сапраўднымі сведкамі Божай міласэрнасці і як навучыцца адказваць любоўю на ўсё, што здараецца ў жыцці.
Адказ на гэтыя няпростыя пытанні моладзь шукала на працягу ўсяго чування. Спрыялі разважанням Крыжовы шлях і тэатральная сцэнка, пастаноўку якіх падрыхтавалі бабруйчане, а таксама Вяночак да Божай Міласэрнасці, што правялі госці з Асіповічаў у музычным суправаджэнні бабруйскага хору. Абмеркаваць свае думкі і пачуцці юнакі і дзяўчаты маглі падчас кава-паўзы.
Пасля перапынку а. Павел Мажэйка ОР з магілёўскай парафіі св. Казіміра заклікаў прысутных да аднаго з найстаражытнейшых спосабаў малітвы Божым словам, што паходзіць ад айцоў пустыні, — Lectio Divina, — каб такім чынам наблізіцца да разумення таямніцы Божай Міласэрнасці.
Скончылася моладзевае чуванне св. Імшой на світанні. Удзельнікі вярталіся дадому стомленыя, але радасныя. Начная малітва напоўніла юнакоў і дзяўчат Магілёўшчыны новым імкненнем жыць у еднасці з Хрыстом.
