З 15 па 19 сакавіка ў Вышэйшай духоўнай семінарыі імя св. Тамаша Аквінскага ў Пінску прайшлі велікапосныя рэкалекцыі для семінарыстаў.
Рэкалекцыі — благаслаўлёны час, што дапамагае наблізіцца да Бога, вярнуць страчаную з Ім сувязь і яшчэ глыбей зразумець Ягоную волю адносна свайго жыцця. Менавіта такім часам сталі велікапосныя рэкалекцыі, якія для студэнтаў Пінскай семінарыі правёў кс. Алег Пятрашка, духоўны айцец першага курса духоўных семінарый у Гродне і Пінску.
Аздараўленне ранаў, любоў Пана, пакліканне, асабістыя адносіны з Езусам — такімі былі асноўныя тэмы разважанняў у дні духоўных практыкаванняў.
Рэкалекцыяніст шчодра дзяліўся ўласным досведам, разважаючы над ім у святле Божага слова.
Праграма рэкалекцый была насычанай: супольная малітва Літургіі гадзінаў, набажэнства Крыжовага шляху, адарацыя Найсвяцейшага Сакрамэнту, канферэнцыі. Галоўным момантам кожнага дня была сустрэча з Панам Езусам у Эўхарыстыі.
У апошні дзень засяроджання семінарысты ўзялі ўдзел у пакутным набажэнстве, падчас якога маглі прыступіць да сакрамэнту пакаяння.
