Пошук


12.03.2019 09:17   Паводле: Кс. Юрый Марціновіч / grodnensis.by / Фота: Кс. Ян Раманоўскі / Catholic.by

З 7 па 9 сакавіка ў Рыме ў сядзібе Канферэнцыі Біскупаў Італіі пад патранатам Рады Канферэнцый Біскупаў Еўропы адбылася сустрэча, прысвечаная душпастырству моладзі.

Як паведамляе партал Гродзенскай дыяцэзіі Grodnensis.by, Беларусь на Міжнароднай сустрэчы дэлегатаў душпастырства моладзі і ўніверсітэтаў Рады Канферэнцый Біскупаў Еўропы прадставілі трое святароў Гродзенскай дыяцэзіі: кс. Ян Раманоўскі, старшыня сінадальнай камісіі па справах моладзі, кс. Анджэй Ганчар, вікарый парафіі св. Вацлава ў Ваўкавыску, і кс. Юрый Ясевіч, які ў дадзены момант вучыцца ў Рыме.

У сустрэчы ўдзельнічалі між іншым кардынал Анджэло Баньяско, старшыня Канферэнцыі Біскупаў Еўропы, біскуп Жан-Клод Ольрыш, адказны за душпастырства моладзі пры CCEE, арцыбіскуп Марэк Ендрашэўскі, адказны за душпастырства студэнцкай моладзі пры CCEE.

Падчас сустрэчы была прадстаўлена справаздача з падрыхтоўкі да Сіноду Біскупаў, а таксама сам ход Сіноду і тэмы, якія там узнімаліся. Пасля кожнай сесіі адбывалася праца ў групах, дзе абмяркоўваліся тэмы, звязаныя з душпастырствам моладзі ў сучасным свеце, найперш як наблізіць і паказаць маладым людзям сёння Езуса і Евангелле.

Удзельнікі прадставілі праблемы і цяжкасці, звязаныя з перадачай Евангелля сучаснаму маладому чалавеку ў розных краінах Еўропы.

Адной з найважнейшых была названа неабходнасць сапраўднага жыцця духоўных асобаў Евангеллем. «Бо для таго, каб прывесці маладога чалавека да Хрыста, трэба самому туды прыйсці», — неаднаразова адзначалася на сустрэчы.

Сярод важных патрэбаў у перадачы Евангелля моладзі быў названы таксама выхад да яе, уменне слухаць яе прапановы, асабістае сведчанне, спадарожнічанне моладзі ў розныя моманты.

Заўважалася, што адна з найважнейшых патрэбаў у перадачы Евангелля маладым людзям — патрэба адукаваных душпастыраў, бо сёння моладзь ставіць шмат пытанняў, і адказ «я табе кажу» не з’яўляецца аргументам.

Падкрэслівалася, што спадарожнічаць маладым людзям у наш час — вялікая адказнасць і высілак, што патрабуе асаблівага ўдзелу і прысвячэння, і некаторыя духоўныя асобы, на жаль, сёння ўцякаюць ад такога служэння.

Мэтай сустрэчы быў супольны пошук адказу на пытанні, звязаныя з перадачай Евангелля маладым людзям ХХІ ст.

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця