Дабрачыннае каталіцкае таварыства Caritas Гродзенскай дыяцэзіі выступіла з ініцыятывай адкрыць у адным з апусцелых дамоў у Гродне пансіянат для састарэлых.
Як паведаміў 7 лютага партал Hrodna.life, яшчэ ў 2018 г. арганізацыя пачала перамовы з адміністрацыяй горада і інвестарамі, аднак апошняе слова застаецца за кіраўніком дзяржавы.
Праект ДКТ Caritas накіраваны на павышэнне ўзроўню сацыяльных паслуг у гродзенскім рэгіёне. Падобных ініцыятываў у Беларусі яшчэ не было.
«Пакуль у нас ёсць ідэя і гарадскія ўлады нас у гэтым вельмі падтрымліваюць, — расказвае намеснік дырэктара ДКТ Caritas Гродзенскай дыяцэзіі Алена Міхайлік. — Цяпер вядуцца перамовы з інвестарамі з Германіі і Аўстрыі. Наша задума — стварыць у Гродне праект з павышаным узроўнем камфорту для людзей у патрэбе. Гэта будзе пансіянат для пажылых людзей: дом састарэлых. Сёння ён вельмі патрэбны».
Сацыяльны цэнтр з аддзяленнем хоспіса будзе аказваць розную дапамогу пажылым гродзенцам. У Caritas ужо ёсць вялікі вопыт у гэтай сферы на тэрыторыі Гродзеншчыны. Гарадскія ўлады падтрымліваюць ідэю дабрачыннай арганізацыі і гатовыя дапамагаць у рэалізацыі.
«Ініцыятывы такіх арганізацый павінны падтрымлівацца на мясцовым узроўні. Мы ўсё за бюджэтныя грошы зрабіць не зможам, трэба шукаць інвестараў, ініцыятараў, людзей неабыякавых», — пра гэта распавёў старшыня Гродзенскага аблвыканкама Уладзімір Краўцоў падчас сустрэчы з прадстаўнікамі Caritas.
Пасля таго, як з будынку на вуліцы Васілька з’ехаў скурвендыспарнсер, у гарадскіх уладаў былі планы выставіць нерухомасць на аўкцыён. Caritas жа просіць перадаць будынак пад дом састарэлых бясплатна. Апошняе слова застаецца за прэзідэнтам.
