Радасць Божага Нараджэння штогод збірае ў студзені ў Івянцы прыхільнікаў калядных спеваў, святочнай атмасферы і радасці ад Нараджэння Пана. Сёлетні дзевяты па ліку калядны фестываль, арганізаваны івянецкімі францішканамі 13 студзеня, не стаў выключэннем.
Госці фестывалю калядавалі разам са слухачамі з Мінска, Гродна і, безумоўна, жыхарамі мястэчка. Паміж калядкамі і пастаралкамі ў выкананні дзіцячых калектываў і хораў (а таксама мясцовага рок-гурта, у якім можна было заўважыць францішканскі габіт) забаўляў гледачоў вядучы фестывалю, каталіцкі блогер Арцём Ткачук.
Не абышлося без сюрпрызу, якім стаў шпітальны клоўн Ігар, што ўвесь фестываль забаўляў маленькіх слухачоў, а дарослым вяртаў радасць дзяцінства.
Асабліва спадабаліся гледачам шматгалоссе палескіх калядак, прадэманстраванае супольнасцю «Ubi Caritas», і па-майстэрску падрыхтаваная батлейка з прыгожай харэаграфіяй ансамбля песні і танца «Lechici».
Не далі сумаваць і запрошаныя госці фестывалю: бадзёры пазітыў і прафесійнасць музыкаў гурта «Рэха» ўжо добра вядомыя івянчанам, а змястоўныя песні Віктара Шалкевіча, выкананыя з бардаўскай шляхетнасцю і драйвам, не маглі не заваяваць сэрцы слухачоў.
