У Віцебскай абласной бібліятэцы ў сардэчнай атмасферы свята Божага Нараджэння прайшла прэзентацыя факсімільнага ўзнаўлення першага беларускага «Буквара», у якой удзельнічалі прадстаўнікі ўстановаў культуры, адукацыі і духоўныя асобы.
Пра даследаванне каштоўнага помніка кніжнай хрысціянскай культуры распавёў намеснік дырэктара Нацыянальнай бібліятэкі Беларусі Алесь Суша:
«Першы „Буквар“ убачыў свет у Вільні ў брацкай друкарні пры манастыры Святога Духа, галоўным цэнтры асветы ВКЛ.
Кніга, па якой вучыліся славянскаму пісьму, пачыналася з малітвы Святому Духу.
Выданне было ўпрыгожана выявай герба вядомага дзеяча Вялікага Княства Літоўскага і актыўнага апякуна праваслаўя Багдана Агінскага, які заснаваў брацкую школу ў Вільні. На яго сродкі выйшла першая ў свеце кніга пад назвай „Буквар“.
Духоўны складнік дамінаваў у навучальным працэсе даўняй Беларусі. Усе навучальныя выданні былі арыентаваныя на замацаванне ў маладым чалавеку хрысціянскай маральнасці, адказнасці, адпаведнасці этычным нормам, адлюстраваным у тэкстах Святога Пісання».
Факсімільнае ўзнаўленне «Буквара» абуджае патрыятычныя пачуцці ў тых, хто дакранаецца да гэтай маленькай кніжачкі.
«„Буквар“ часта ставяць поруч з Бібліяй, якая задае каштоўнасныя арыенціры ў душы чалавека», — сказаў Алесь Суша.
Ва ўрачыстай атмасферы выданне было перададзена ў Віцебскі дзяржаўны педагагічны ўніверсітэт імя Машэрава, Віцебскі медынстытут і ветэрынарную акадэмію, уручана дырэктару абласной бібліятэкі.
«Калі ў фонд бібліятэкі трапляюць такія выданні, як факсімільнае ўзнаўленне твораў Францішка Скарыны, як Слуцкае і Тураўскае Евангелле, як „Буквар“, якасць фонду значна ўзрастае», — адзначыла дырэктар бібліятэкі Таццяна Адамян.
Падзяку даследчыку выказаў старэйшы прарэктар Віцебскай духоўнай семінарыі пратаіерэй Аляксандр Мазалёў.
Сёлета, як адзначыў Алесь Суша, быў праведзены цэлы шэраг мерапрыемстваў, прысвечаных першаму «Буквару», — ХIV Міжнародныя кнігазнаўчыя чытанні, выстава «Буквары народаў свету» з калекцыі латвійскага педагога і перакладчыка Юрыса Цыбульса, прэзентацыі факсімільнага ўзнаўлення «Буквара» ў розных гарадах краіны, а таксама ў Лондане і Вільні.
