Падчас актавы ўрачыстасці Нараджэння Пана ў многіх вернікаў узнікае пытанне: ці трэба «пасціць» у гэтую пятніцу, або ўстрымлівацца ад мясной ежы?
Сёлета гэты дзень прыпадае 28 снежня, калі Касцёл адзначае свята святых Немаўлят, мучанікаў.
У гэты дзень у адпаведнасці з нормамі кананічнага права неабходна ўстрымлівацца ад мясных страваў, як і ў кожную пятніцу года.
Паводле Кодэксу кананічнага права, устрыманне ад мясных страваў у пятніцу не з’яўляецца абавязковым у трох выпадках:
- калі на гэты дзень прыпадае якая-небудзь урачыстасць (канон 1251),
- калі гэты дзень мае ўрачысты статус (напрыклад, пятніца ў актаве Пасхі),
- калі згодна з нормамі кананічнага права хтосьці атрымлівае дыспенсу (вызваленне) ад такога ўстрымання (канон 87 § 1).
На працягу літургічнага года адзначаюцца дзве актавы, якія маюць розны статус. Актава Пасхі мае статус урачыстасці, а актава Нараджэння Пана мае статус свята, як гэта пададзена ў Табліцы першынства літургічных дзён, прыведзенай у «Агульных нормах літургічнага года і календара» ў Рымскім Імшале.
Такім чынам, актава Нараджэння Пана, якая мае статус свята, а не ўрачыстасці, не адмяняе абавязку ўстрымання ад мясной ежы ў пятніцу.
