15 снежня навучэнцы і супрацоўнікі Катэхетычнага каледжа ў Баранавічах сабраліся на традыцыйную аплаткавую сустрэчу.
Галоўным пунктам святочнага дня стала святая Імша, якую цэлебраваў канцлер курыі Пінскай дыяцэзіі кс. Андрэй Рылка. У гаміліі святар правёў параўнанне двух спосабаў успрымання часу: сhronos і kairos. Першы з іх, адзначыў ён, належыць да парадку гісторыі гэтага свету, у якой мы жывем, а другі — гэта час ласкі, дадзены чалавеку любячым Богам.
Час ласкі, паводле слоў кс. Андрэя, — гэта таксама магчымасць быць разам і супольна ўзрастаць у веры.
Пасля Імшы адбылося прадстаўленне сцэнкі на тэму Божага Нараджэння, якую падрыхтавалі навучэнцы другога курса каледжа, дзяленне аплаткай і вячэра.
Складаючы віншаванні прысутным, дырэктар каледжа кс. Юрый Дрозд пажадаў кожнаму імкнуцца да адзінства і добрых адносінаў з Богам, блізкімі і ўсімі людзьмі, якія сустракаюцца нам на жыццёвым шляху.
