На мінулым тыдні ў магазіне «Родны кут» па вул. Міцкевіча ў Навагрудку быў дадзены старт дабрачыннай каляднай акцыі «Кошык Дабрыні».
Арганізатар акцыі – навагрудская парафія Святога Арханёла Міхала сумесна з парафіянамі, а таксама гандлёвыя аб’екты Навагрудка і Навагрудскага раёна.
Праект накіраваны на аказанне дапамогі дзецям з малазабяспечаных сем'яў. Як расказаў пробашч парафіі Святога Міхала Арханёла ксёндз Юрый Жэгарын, упершыню падобная акцыя была арганізавана ў 2017 г. парафіяй Св. Казіміра. Сёлета было прынята рашэнне правесці яе больш маштабна, каб дапамогу атрымалі як мага больш сем'яў.
У адкрыцці акцыі прынялі ўдзел пробашч парафіі Святога Казіміра кс. Віталій Цыбульскі, сястра Гелена з манаскай супольнасці сясцёр Найсвяцейшай Сям'і з Назарэта, дырэктар Навагрудскага філіяла Гроднааблспажыўтаварыства Валянціна Кандратовіч, парафіяне і супрацоўнікі магазіна.
Арганізатары акцыі сталі яе першымі ўдзельнікамі і за пару хвілін напоўнілі першы кошык.
У гандлёвых аб'ектах горада і магазінах «Родны кут» у аграгарадках падчас акцыі збіраюцца прадукты харчавання, якія не патрабуюць асаблівых умоў захоўвання і маюць вялікі тэрмін годнасці (крупы, мука, алей, кансервы, пячэнне і г.д.), гігіенічных прыладаў, канцылярскіх тавараў і інш.
Прыняць удзел у акцыі можа любы ахвотны – для гэтага трэба набыць пэўны тавар і пакласці яго ў спецыяльны кошык, усталяваны ў магазіне. Калі «Кошык дабрыні» будзе запоўнены, сабраныя прадукты і тавары паўсядзённага попыту перададуць у сем'і.
Працягнецца акцыя да 10 студзеня.
