Для студэнтаў Вышэйшай духоўнай семінарыі ў Гродне стала традыцыяй кожны год далучацца да ўдзелу ў рэкалекцыях цвярозасці, што праходзяць у гродзенскім рэктаральным касцёле Звеставання Пана для ананімных алкаголікаў, якія некалькі разоў у год збіраюцца разам, каб дапамагчы сабе і адно аднаму пазбавіцца ад гэтай згубнай звычкі.
1 снежня ўдзельнікі семінарыйнага музычнага гурта «AVE» таксама мелі магчымасць наведаць рэкалекцыі і памаліцца разам з іх удзельнікамі на святой Імшы. Пасля яе семінарысты выступілі з невялікай музычнай праграмай для ўдзельнікаў.
Кожную суботу студэнты Вышэйшай духоўнай семінарыі збіраюцца на супольную малітву, каб сваёй духоўнай падтрымкай дапамагчы тым, хто жадае вызваліцца ад алкагольнай залежнасці. А непасрэдная сустрэча, дзякуючы якой семінарысты ўбачылі няспыннае жаданне ўдзельнікаў гэтых рэкалекцый змяніць сваё жыццё, працаваць над сабой і над сваімі слабасцямі, вельмі моцна ўзрушыла будучых святароў і стала яшчэ адным штуршком да таго, каб прысвяціць сваё служэнне найбольш патрабуючым.
