Католікі Магілёва ва ўрачыстасць Усіх Святых маліліся ў катэдральным касцёле Унебаўзяцця Найсвяцейшай Панны Марыі і св. Станіслава аб дары святасці для кожнага чалавека, а асабліва для моладзі.
Біскупскі вікарый для Магілёўшчыны біскуп Аляксандр Яшэўскі SDB, які ўзначаліў вечаровую святую Імшу, у гаміліі адзначыў, што сярод святых былі багатыя і бедныя, адукаваныя і зусім простыя людзі.
«Гэта былі не толькі духоўныя і кансэкраваныя асобы, але і людзі з сем’ямі, жанатыя і замужнія, моладзь і дзеці, — зазначыў іерарх. — Усе яны змаглі дасягнуць збаўлення і стаць святымі.
Гледзячы на іх прыклад, ніхто з нас не мае ніякіх апраўдальных аргументаў, што мы знаходзімся ў нейкіх асаблівых сучасных умовах і дасягнуць святасці ў іх немагчыма. Адважуся сказаць, што тыя, хто нас апярэдзіў у вечнасці, ззяючы сёння прыкладам святасці, знаходзіліся ў абставінах больш цяжкіх, чым сёння мы».
Паводле слоў біскупа, «святасць — гэта не ганаровая грамата за добра пражытае жыццё, не залаты медаль і не чырвоны дыплом, дзе адны толькі дзясяткі»:
«Святасць — гэта сведчанне пра асабістае „так“, якое чалавек гаворыць у адказ на Божы заклік жыць паводле Яго навукі».
«У жыцці кожнага з нас ёсць месца памылкам і зманам. Большасць з нас не пазбегла і досведу цяжкіх грахоў. Аднак, калі мы хочам быць сапраўднымі хрысціянамі, то павінны памятаць, што ў першую чаргу мы пакліканы да святасці. Пра гэта ўвесь час кажа ў сваіх пасланнях апостал Павел, што Бог „выбраў нас у Ім перад стварэннем свету, каб мы былі святымі і беззаганнымі перад Ім у любові“ (Эф 1,4). Тое ж самае сцвярджае апостал Пётр: „на ўзор Святога, які паклікаў вас, самі станьце святымі ва ўсіх паводзінах вашых“ (1П 1,15).
Узіраючыся сёння ў постаці усіх святых, можна дадаць, што Касцёл — наша Маці, якая паказвае, што і для нас адчынены дзверы, каб стаць сапраўдымі хрысціянамі.
Імкненне да святасці ў канкрэтным жыцці не трэба адкладаць на пасля. Святы Аўгустын параўноўваў адкладанне намі свайго навяртання і выпраўлення на заўтра — з карканнем вароны. Ці доўга мы яшчэ будзем каркаць? Чаму б нам не распачаць навяртанне і выпраўленне сёння, зараз?..»
