Пошук


03.07.2018 11:23   Grodnensis.by

У Карэлічах у свята Маці Божай Нястомнай Дапамогі, галоўнай апякункі парафіі, адзначылі 25-годдзе служэння ў Беларусі Ордэна святога Паўла — першага пустэльніка (паўлінаў).

Першае служэнне на тэрыторыі Беларусі айцоў паўлінаў непрацяглы час праходзіла пры гродзенскай катэдры, а таксама ў парафіях у Ваўкавыску і Новым Двары.

На працягу 25 гадоў айцы нясуць служэнне ў парафіях Маці Божай Нястомнай Дапамогі ў Карэлічах і Св. Ганны ў Варончы (Навагрудскі дэканат). Тут сёння служаць тры манахі: а. Леанард Адушкевіч OSPPE, а. Ануфрый Альховік OSPPE і а. Юрый Саковіч OSPPE.

На ўрачыстую Імшы-падзяку за служэнне паўлінаў, якія звязаны з «Чорнай Мадоннай» з Чэнстаховы (Польшча), прыбылі шматлікія госці — духоўныя і свецкія асобы, а таксама сябры парафіі і парафіяне. Эўхарыстыю ўзначаліў біскуп Гродзенскі Аляксандр Кашкевіч.

У час літургіі дзякавалі за служэнне ў Беларусі першых паўлінаў: спачылага а. Марка Смея OSPPE, спачылага а. Януша Вітоўскага OSPPE і а. Войцеха Вішнеўскага OSPPE.

Іерарх падзякаваў айцам паўлінам за адданае служэнне Касцёлу на Гродзеншчыне і за штодзённую працу вядзення вернікаў да Бога, а таксама за пашырэнне культу Маці Божай на нашых землях.

Даведка:

Ордэн святога Паўла — першага пустэльніка (паўлінаў) быў заснаваны ў Венгрыі бл. Еўзэбіем з Астрыхома. Назва супольнасці паходзіць ад імені св. Паўла з Тэб, першага пустэльніка, прызнанага Каталіцкім Касцёлам. Мэтай ордэна з’яўляецца сузіранне, малітва, пакаянне, распаўсюджванне культу Маці Божай і здзяйненне сакрамэнту пакаяння і паяднання. Заклік ордэна — Solus cum Deo solo («сам-насам з Богам»).

Паўліны вядуць душпастырскую дзейнасць у Амерыцы, Аўстраліі, Афрыцы, многіх краінах Еўропы: Венгрыі, Польшчы, Харватыі, Украіне, Латвіі, Славакіі, Чэхіі, Германіі, Францыі, Англіі, Іспаніі, Румыніі. З 1993 года яны служаць таксама ў Беларусі.

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця