15 чэрвеня Міждыяцэзіяльная вышэйшая духоўная семінарыя імя св. Тамаша Аквінскага ў Пінску завяршыла 2017–2018 навучальны год, які стаў апошнім годам, калі гэтая вышэйшая духоўная навучальная ўстанова дзейнічала як міждыяцэзіяльная.
З гэтай нагоды ўся супольнасць семінарыі — выкладчыкі, выхавацелі і студэнты — сабралася падзякаваць Богу на св. Імшы ў семінарыйнай капліцы Найсвяцейшага Імя Марыі. Калі семінарыя з’яўляецца сэрцам дыяцэзіі, дык капліца, несумненна, з’яўляецца сэрцам семінарыі.
Цэлебрацыю Эўхарыстыі ўзначаліў біскуп Пінскі Антоні Дзям’янка — Вялікі канцлер Міждыяцэзіяльнай вышэйшай духоўнай семінарыі імя св. Тамаша Аквінскага, якая ўжо стала гісторыяй.
У сваёй гаміліі біскуп звярнуў увагу прысутных на неабходнасць верна слухаць Бога і ў кожнай сітуацыі больш давяраць Ягонаму Провіду, а не паддавацца ўласным чалавечым страхам і слабасцям. Як прыклад такіх адносінаў з Богам біскуп Дзям’янка ўзгадаў прарока Іллю, пра якога ішла гаворка ў Літургіі слова. Іерарх параўнаў з палымяным прарокам Старога Запавету адданых пастыраў нашай зямлі мінулага стагоддзя, якія перажылі часы пераследу і адраджэння Касцёла, паказаўшы ўзор хрысціянскай і святарскай вернасці і трываласці.
На заканчэнне навучальнага года семінарыст пятага курса Януш Чарнамораў быў урачыста прыняты ў шэраг кандыдатаў да сакрамэнту пасвячэння. У цэлебрацыі заключнай св. Імшы браў удзел таксама выпускнік семінарыі кс. Эдуард Мажаеў, які нядаўна стаў святаром і на заканчэнне ўдзяліў усім прысутным прыміцыйнае благаслаўленне.
Пасля св. Імшы біскуп Антоні Дзям’янка разам з рэктарам семінарыі кс. Андрэем Рылкам уручылі дыпломы аб заканчэнні Міждыяцэзіяльнай вышэйшай духоўнай семінарыі імя св. Тамаша Аквінскага ў Пінску чатыром яе апошнім выпускнікам, двое з якіх — дыяканы Андрэй Бурак і Яўген Баланёў з Мінска-Магілёўскай архідыяцэзіі — ужо зусім хутка стануць святарамі.
З наступнага навучальнага года Вышэйшая духоўная семінарыя ў Пінску ў якасці эксперыменту будзе дзейнічаць як дыяцэзіяльная.
