Пошук


24.05.2018 06:00   Catholic.by

Свята Езуса Хрыста, Найвышэйшага і Вечнага Святара, з’яўляецца ўшанаваннем таямніцы святарства Хрыста і нагодай для больш глыбокага яе духоўнага перажывання.

Свята Езуса Хрыста, Найвышэйшага і Вечнага Святара, было ўстаноўлена ў паўсюдным Касцёле папам Бэнэдыктам XVI па прапанове епіскапатаў розных краін і прадстаўнікоў манаскіх супольнасцяў як рэха асаблівага Года святарства, які праходзіў падчас яго пантыфікату з 19 чэрвеня 2009 г. да 11 чэрвеня 2010 г.

Днём свята быў вызначаны чацвер пасля ўрачыстасці Спаслання Духа Святога. Гэта значыць, што мы адзначаем свята Езуса Хрыста, Найвышэйшага і Вечнага Святара, за тыдзень да ўрачыстасці Найсвяцейшага Цела і Крыві Хрыста.

Чацвер традыцыйна лічыцца «святарскім» днём, бо менавіта ўвечары ў чацвер Хрыстус, напярэдадні сваёй мукі і крыжовай смерці, спажыў з апосталамі Апошнюю Вячэру, на якой устанавіў сакрамэнт Эўхарыстыі і службовае святарства, якое адрозніваецца ад паўсюднага святарства Божага народа асаблівым удзелам у святарстве Хрыста тых, хто прымае сакрамэнт пасвячэнняў у сане прэзбітэраў або біскупаў.

Дэ гэтага часу ў Касцёле існавала магчымасць цэлебраваць ватыўную св. Імшу пра Езуса Хрыста, Найвышэйшага і Вечнага Святара (гл. Рымскі Імшал для дыяцэзій на Беларусі, с. 1476–1477), літургічны фармуляр якой можна выкарыстаць таксама і ў дзень свята. Гэта зазвычай было прынята рабіць у першы чацвер месяца, калі ўвесь Касцёл асаблівым чынам моліцца аб пакліканнях да святарства і дзякуе Хрысту за сакрамэнт Эўхарыстыі і за службовае святарства.

Абноўлена 25.05.2018 09:23
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця