16–17 красавіка для вучняў выпускных класаў са Шчучына была арганізавана пілігрымка ў Нацыянальны санктуарый Найсвяцейшай Панны Марыі ў Будславе.
Перад цудатворным абразом Маці Божай Будслаўскай выпускнікі ўзнеслі свае малітвы і просьбы, найперш просячы Маці Божую Будслаўскую аб духоўнай падтрымцы і заступніцтве на час экзаменаў, а таксама аб дапамозе ў добрым выбары сваёй будучыні. Менавіта ў такой інтэнцыі ў Нацыянальным санктуарыі адбылася святая Імша, якую ўзначаліў яго кусташ а. Віктар Бурлака OFM.
У кароткай, але насычанай пілігрымцы шчучынская моладзь мела магчымасць наведаць шмат цікавых мясцінаў і святыняў Беларусі. Іх першым малітоўным прыпынкам стаў касцёл св. Пятра і Паўла ў Іўі — выдатны помнік старажытнабеларускай архітэктуры, што спалучае ў сабе элементы першапачатковай готыкі і больш позні барочны выгляд. У гэтым старажытным мястэчку, дзе здаўна жывуць прадстаўнікі беларускай мусульманскай супольнасці, знаходзіцца таксама гістарычная мячэць, якую многія з пілігрымаў убачылі ўпершыню.
Далей па дарозе юнакі і дзяўчаты памаліліся перад цудатворнымі абразамі Маці Божай у Гудагаі і ў Барунах, захапляліся непараўнальнай прыгажосцю касцёла Найсвяцейшай Тройцы ў Гервятах і наведалі руіны Крэўскага замка, дзе ў 1385 г. было падпісана пагадненне паміж Вялікім княствам Літоўскім і Каралеўствам Польскім.
Падчас вандроўкі па чароўных мясцінах роднага краю юныя пілігрымы мелі магчымасць адпачыць на самым вялікім беларускім возеры Нарач і ўбачыць найбольшы штучны вадаём у краіне — Вілейскае вадасховішча: асноўны рэзервуар Вілейска-Мінскай воднай сістэмы, якая з сярэдзіны 70-х гадоў мінулага стагоддзя забяспечае пітной вадой беларускую сталіцу. Акрамя таго, удзельнікі пілігрымкі ўбачылі таямнічы замак у Гальшанах і адчулі гасціннасць вернікаў, святароў і манахаў у святынях Нарачы, Мядзеля і Вілейкі.
Пілігрымка вучняў выпускных класаў у Будслаў стала ўжо сёмай у гісторыі шчучынскай парафіі.
