Пошук

03.04.2021 08:00   Тэкст: Мікола Гракаў / Фота: Віталій Палінеўскі / Catholic.by
Фота Віталія Палінеўскага

Вялікая субота — гэта дзень, калі ўвесь Хрыстовы Касцёл прабывае ў жалобе і святым маўчанні перад грабніцай свайго Пана і Збаўцы Езуса Хрыста.

На працягу ўсяго гэтага дня вернікі прыходзяць у касцёл, каб у малітоўнай цішыні пабыць сам-насам з Езусам у грабніцы.

Знайсці час на адарацыю Збаўцы, які аддаў за нас сваё жыццё, пакліканы сёння кожны хрысціянін.

Сёлета на нашым партале гэта можна зрабіць таксама анлайн.

Прамая трансляцыя адарацыі з мінскай архікатэдры Найсвяцейшага Імя Марыі

Вялікая субота — таксама дзень падрыхтоўкі да святкавання, калі гатуюцца і благаслаўляюцца традыцыйныя велікодныя стравы.

У іх знайшлі адлюстраванне асноўныя элементы пасхальнага сэдэру — старазапаветнай пасхальнай вячэры (гл. Зых 12, 1–8).

Замест пасхальнага ягняці — смачныя кілбасы і вяндліны, замест горкіх траваў — наш хрэн з бурачком або смятанай, замест праснакоў — кулічы і булкі.

Фота Віталія Палінеўскага

Аднак віна мы ўжо тут не бачым: за велікодным сталом не прынята спажываць алкаголь.

Традыцыя асвячэння велікодных страваў у касцёле існуе, бадай што, толькі ў нас, дзе цесна перапляліся звычаі і традыцыі заходняга і ўсходняга хрысціянства: каталіцтва і праваслаўя.

Таксама чыста славянскім элементам велікоднага стала з’яўляюцца фарбаванкі, пісанкі — рознакаляровыя яйкі, найчасцей чырвоныя, як сімвал уваскрослага Хрыста — Сонца, якое не ведае заходу.

Фарбаванне яек і прыгожае складанне кошычкаў з ежай для пасвячэння — цэлае мастацтва, што займае ў нашых гаспадыняў шмат часу і прыносіць вялікую радасць дзецям.

Фота Віталія Палінеўскага

 

У гэты дзень вернікі таксама традыцыйна захоўваюць пост, як і ў Вялікую пятніцу.

І хоць смачныя пахі велікодных страваў казычуць нос, але з іх спажываннем давядзецца пачакаць да нядзелі, калі, прывітаўшы адно аднаго воклічамі «Хрыстус уваскрос! — Сапраўды ўваскрос!» — сям’я збярэцца за адным сталом, каб падзяліцца радасцю гэтай асноўнай падзеі хрысціянскай веры: Уваскрасення Хрыста з мёртвых.

Абноўлена 03.04.2021 08:48
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця