Пошук

19.02.2018 17:55   Тэкст і фота: Аксана Ючкавіч / Catholic.by

Міжнародная сустрэча скаўтаў Еўропы сабрала беларускіх і польскіх удзельнікаў скаўцкага руху 17 лютага ў Гродне, у моладзевым цэнтры парафіі Найсвяцейшага Адкупіцеля (м-рн Дзевятоўка). Яе ўдзельнікаў благаславіў дапаможны біскуп Гродзенскай дыяцэзіі Юзаф Станеўскі.

Актуальна для Касцёла і грамадства

Пашырэнне скаўцкага руху і выхаванне дзяцей і моладзі праз скаўтынг — гэта тое, што зараз вельмі актуальна для Каталіцкага Касцёла і грамадства ў цэлым. Менавіта так можна акрэсліць асноўную ідэю сустрэчы, падчас якой прадстаўнікі з Польшчы дзяліліся з беларусамі сваім вопытам у скаўцкім служэнні.


Бацькі — гэта анёлы-ахоўнікі ў скаўцкім руху

На сустрэчу былі запрошаныя не толькі тыя, хто непасрэдна займаецца скаўтынгам, але і бацькі, чые дзеці ўдзельнічаюць у скаўцкім руху. Скаўтынг немагчымы без удзелу бацькоў, якія з’яўляюцца вялікай дапаможнай сілай асабліва на першай ступені выхавання дзяцей (8–11 гадоў).

Роля бацькоў не абмяжоўваецца іх прысутнасцю і матэрыяльнай дапамогай, але найперш заключаецца ў падтрымцы дзіцяці, у дапамозе яму зразумець, што скаўтынг — гэта важна і адказна.

На жаль, пакуль яшчэ не ў кожнай беларускай парафіі ведаюць асноўную інфармацыю пра каталіцкіх скаўтаў і магчымасці, якія нясе для дзяцей і моладзі гэты рух і ўдзел у ім. Не толькі ў Беларусі, але і ў Польшчы неабходна папулярызаваць гэты рух, як адзначылі нашы заходнія госці.


Далучыцца да прыгоды

Удзел у скаўтынгу — гэта найперш удзел у прыгодзе, вялікай прыгодзе, без якой не можа адбыцца сталення і якаснага станаўлення асобы.


На чым грунтуецца скаўтынг?

Асновы скаўтынгу:

  • служэнне Богу;
  • выхаванне характару;
  • здароўе;
  • прынцып любові да іншых і выйсце з эгаізму;
  • педагогіка прыроды;
  • братэрства;
  • досвед Паўсюднага Касцёла;
  • выхаванне маладых маладымі, натуральныя аўтарытэты.


Хто? Калі? Як?

Хто прыходзіць у скаўцкі рух? Чаму прыходзяць у скаўцкі рух? Ці не позна далучыцца, калі табе каля сарака, а не 13–14 гадоў?

Асаблівасці ўзросту і псіхалогіі дзяцей і падлеткаў, патрабаванні да сябе і да тых, каму ты служыш. Цяжкасці і пытанні, якія ўзнікаюць на шляху папулярызацыі гэтага руху. Дапаможныя крыніцы і літаратура. Роля душпастыра ў гэтым руху. Ці можа святар быць скаўтам. Поспехі і паразы. Гэтыя і многія іншыя пытанні былі паднятыя падчас сустрэчы.

Скаўтынг ідзе пад харугвай хрысціянства, якое ўтварыла і сфармавала Еўропу, захоўваючы традыцыі і каштоўнасці продкаў для нашчадкаў.


Варта адрозніваць скаўтынг ад турызму, спорту, рэлігійнага руху

Скаўтынг не з’яўляецца

  • ані працягам школы;
  • ані спортам;
  • ані рэлігійным рухам;
  • ані парафіяльнай групай;
  • ані арганізацыяй адпачынку;
  • ані ніжэйшай духоўнай семінарыяй;
  • ані турыстычным клубам.

Скаўтынг — гэта шлях да сталення для маладых людзей, які можна распачаць ужо з васьмігадовага ўзросту. Але далучыцца да гэтага шляху ніколі не позна.

Сустрэча скончылася Гадзінай Святла, як называецца ў скаўтаў малітва перад Найсвяцейшым Сакрамэнтам, а таксама супольнай Эўхарыстыяй.

Больш падрабязна пра скаўцкі рух у Беларусі тут >>>

Абноўлена 20.02.2018 12:07
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця