7 студзеня, у свята Хросту Пана, дапаможны біскуп Мінска-Магілёўскай архідыяцэзіі Аляксандр Яшэўскі SDB узначаліў ранішнюю святую Імшу ў бабруйскім касцёле Беззаганнага Зачацця Найсвяцейшай Панны Марыі.
На пачатку Імшы іерарх прапанаваў парафіянам узгадаць свой уласны хрост, падзякаваць за яго Пану Богу, а таксама падзякаваць за бацькоў, хросных, святара, што ўдзяліў некалі гэты першы сакрамэнт.
Сам жа біскуп маліўся падчас Эўхарыстыі за ўвесь Бабруйскі дэканат, а асаблівым чынам за новыя пакліканні з бабруйскай парафіі і аб ласцы вытрымкі для тых, хто ўжо на шляху служэння Пану.
Іерарх звярнуў увагу, што святам Хросту Пана завяршаецца адзін з самых урачыстых перыядаў літургічнага года — Божае Нараджэнне. Біскуп пажадаў прысутным, каб для кожнага гэтае свята было не проста прыгожым і багатым на прыемныя пачуцці: у гэты час, акрамя радаснага святкавання, варта разважаць над тым, чаму Бог прыйшоў у наш свет і што гэта азначае для мяне, для майго жыцця ў вечнасці.
Біскуп казаў у гаміліі пра Святую Сям’ю, пра тое, як патрэбныя сёння свету такія святыя і моцныя сем’і. Па словах іерарха, варта памятаць, што людзі, дадзеныя нам у жыцці, — гэта дар ад Бога; наш сужэнец — гэта той адзіны і найлепшы чалавек, які патрэбны нам для ўзрастання ў святасці, ён — Божы дар нам, як Марыя была Божым дарам для Юзафа.
«Волю Божую выконваць нялёгка, — адзначыў біскуп, кажучы пра гісторыю Марыі і Юзафа. — Але гэта адзіная дарога, што вядзе да збаўлення і шчасця ў жыцці».
Узгадваючы словы «Ты — Сын Мой умілаваны, Цябе ўпадабаў Я», якія прамовіў Бог Айцец да Езуса Хрыста падчас Ягонага хросту ў Ярдане, біскуп заклікаў парафіян: «Кажыце кожны дзень гэтыя словы сваім дзецям: ты — мой сын умілаваны, ты – мая дачка ўмілаваная, цябе ўпадабаў я. Падтрымка і любоў вельмі важная для нашых дзяцей. Езус пасля гэтых словаў ад Айца пайшоў і тры гады служыў і сведчыў пра тое, які добры Ягоны Айцец».
Напрыканцы Імшы біскуп Аляксандр Яшэўскі благаславіў ваду, якую прынеслі з сабой парафіяне, і заахвоціў карыстацца ёй як мага часцей: пры выхадзе з дому, у цяжкіх сітуацыях, асабліва ў барацьбе са спакусамі.
Пасля Імшы прайшла аплаткавая сустрэча біскупа з вернікамі. Парафіяне падыходзілі да іерарха, каб выказаць яму віншаванні з Божым Нараджэннем і атрымаць благаслаўленне.
