«Няхай добры Бог аддзячыць усім, хто прычыніўся да гэтай пачэснай справы, — адзначыў Апостальскі Нунцый у Беларусі арцыбіскуп Габар Пінтэр на пачатку святой Імшы, якая адбылася пасля прэзентацыі афіцыйнага рыма-каталіцкага выдання Новага Запавету.
Прэзентацыя першага поўнага афіцыйнага рыма-каталіцкага выдання Новага Запавету на беларускай мове прайшла 25 лістапада падчас біблійнага сімпозіума ў мінскім Чырвоным касцёле.
«Касцёл заўсёды шанаваў Божае Пісанне, як і само Цела Пана, паколькі, асабліва ў святой Літургіі, ён няспынна бярэ са стала Божага слова і Цела Хрыстовага хлеб жыцця і ўдзяляе яго вернікам», — нагадаў арцыбіскуп Пінтэр.
Як адзначыў Апостальскі Нунцый, «прэзентацыя першага поўнага афіцыйнага рыма-каталіцкага выдання Новага Запавету на беларускай мове — гэта бачны знак развіцця мясцовага Касцёла і яго любові да Бога».
