![](/3/images/news/2017/11/6991/2017-10-29-juda-12.jpg)
Удзельнікі Канферэнцыі Каталіцкіх Біскупаў у Беларусі здзейсняць візіт аd limina Apostolorum з 31 студзеня па 7 лютага 2018 года. Пра гэта стала вядома на 67-м пленарным пасяджэнні епіскапату, падчас якога была абмеркавана папярэдняя праграма паездкі.
Візіт беларускіх біскупаў у Рым у межах аd limina Apostolorum стане чацвёртым па ліку ў гісторыі сучаснай Беларусі. Апошні раз ён праходзіў 11-17 снежня 2009 года.
Кульмінацыяй візіту стане сустрэча з Папай Рымскім. У 2017 годзе Пантыфік унёс змены ў пратакол візітаў Ad limina — цяпер сустрэчы біскупаў са Святым Айцом праходзяць за зачыненымі дзвярыма.
«Нам трэба прадставіць свой Касцёл: хто мы такія, адкуль прыбылі, як мы жывём, якія праблемы існуюць? Мы кажам адкрыта аб нашых праблемах. Напрыклад, тое ж пытанне падпісання канкардату або пагаднення паміж Канферэнцыяй Біскупаў і дзяржавай, — адзначаў Мітрапаліт Тадэвуш Кандрусевіч у каментарыі Ватыканскаму радыё. — Мы кажам таксама, якімі праблемамі жыве беларускі народ, якія выклікі існуюць у нас. У Ватыкане павінны ведаць аб гэтым, і не толькі з нейкіх навін, а з першых рук. Нам важна пачуць меркаванне Папы адносна вырашэння гэтых праблем – асабісты кантакт з ім незвычайна каштоўны для нас».
Падчас візіту беларускі іерархі будуць цэлебраваць Імшу ў чатырох вялікіх рымскіх базыліках: св. Пятра, св. Паўла за мурамі, св. Яна на Латэране і святой Марыі Вялікай (Санта-Марыа-Маджорэ).