25 кастрычніка ў парафіі Св. Тэрэзы Авільскай у Шчучыне айцы піяры арганізавалі дзень падзякі Богу за новага святога — сабрата піяра Фаўстыно Мігеза.
Кананізацыя айца Фаўстыно адбылася 15 кастрычніка ў Рыме, дзе Святы Айцец Францішак урачыста абвясціў іспанскага піяра святым.
25 кастрычніка падчас кожнай Імшы ў шчучынскім касцёле гучалі звесткі пра новага святога, які, між іншым, з’яўляецца заснавальнікам манаскай супольнасці сясцёр каласанцінак.
Айцец Фаўстыно рэалізоўваў сваё пакліканне ў харызме піяраў не толькі праз навучанне іншых, але таксама прысвячаючы шмат часу ўласнай адукацыі, дзякуючы чаму мог выкладаць мноства дысцыплін — лацінскую мову, алгебру, гісторыю, рыторыку, французскую мову, прыродазнаўства, геаграфію, фізіку, хімію.
Фаўстыно Мігез — трэці святы з супольнасці піяраў. Яго кананізаванымі папярэднікамі з’яўляюцца св. Юзаф Каласанс, заснавальнік ордэна, і св. Пампіліо Марыя Піроці.
Айцы піяры — законная супольнасць святароў і братоў, заснаваная ў Рыме св. Юзафам Каласансам з мэтай навучання і выхавання дзяцей і моладзі.
