У Бялынічах 24 верасня прайшлі ўрачыстасці Маці Божай, у якіх прымалі ўдзел вернікі і духоўныя асобы Магілёўшчыны.
Бялыніцкі абраз — другі па ліку пасля абраза Маці Божай Жыровіцкай на тэрыторыі Беларусі, які быў ушанаваны папскімі каронамі. Каранацыя абраза ў Бялынічах адбылася ў 1761 годзе.
Паводле гістарычных звестак, у ХVІІІ–ХІХ стст. абраз, якi знаходзiўся ў мясцовым касцёле кармэлiтаў абутых, збіраў пілігрымаў усiх хрысцiянскiх канфесiй. Існавала таксама кніга, у якой запісваліся цуды за 1725–1836 гг.
У гады вайны абраз захоўваўся ў Магiлёўскiм абласным краязнаўчым музеі, адкуль знiк, і да сёння яго месцазнаходжанне невядома.
23 верасня ўжо ў другі раз з Магілёва ў Бялынічы вырушыла пешая пілігрымка на чале з біскупам Аляксандрам Яшэўскім SDB.
У пілігрымцы прынялі ўдзел амаль 100 чалавек, сярод якіх былі вернікі, святары і кансэкраваныя асобы з парафій Магілёва, Рубяжэвіч, Барысава, Дзяржынска і Вілейкі.
Пры адноўленай бялыніцкай святыні, якую перабудавалі са звычайнай драўлянай хаты ў прыгожую капліцу, пілігрымаў прывітаў пробашч бялыніцкай парафіі кс. Віталь Маргуноў.
У 15 гадзін тут распачалася адпустовая святая Імша, якую ўзначаліў запрошаны біскуп Віцебскі Алег Буткевіч.
У гаміліі, разважаючы над Божым словам, іерарх згадаў пра велічныя справы Божага Провіду ў тым, што не пакінуў вернікаў без апекі, пасылаючы знакі сваёй прысутнасці ў розныя месцы праз цудоўныя аб’яўленні Божай Маці.
Пасля Імшы біскуп Алег Буткевіч асвяціў муры адноўленай капліцы.
«Ужо сёння запрашаем у ІІІ пілігрымку Магілёў-Бялынічы, якая вырушыць на Бялыніцкі фэст 22 верасня 2018 года з Магілёва, — дадаў біскуп Аляксандр Яшэўскі SDB. — Адначасова запрашаем арганізаваць і іншыя адмысловыя пілігрымкі з вашых парафій, гарадоў і мястэчак да Маці Божай Бялыніцкай — “Валадаркі зямлі Магілёўскай”».
