14 верасня Мітрапаліт Тадэвуш Кандрусевіч прыняў удзел у адкрыцці міжнароднага кангрэса «500 гадоў беларускага кнігадрукавання», які праходзіць у Нацыянальнай бібліятэцы Беларусі.
Гэтая дата мае сусветную значнасць і ўнесена ў каляндар памятных дат ЮНЕСКА. У межах міжнароднага кангрэса праходзіць таксама святкаванне 95-годдзя з дня заснавання Нацыянальнай бібліятэкі Беларусі.
Форум, арганізаваны Міністэрствам культуры Рэспублікі Беларусь і Нацыянальнай бібліятэкай Беларусі, праходзіць пад патранатам ЮНЕСКА. Суарганізатарамі выступаюць Цэнтральнаеўрапейская ініцыятыва і Бібліятэчная асамблея Еўразіі.
Сярод тэмаў для абмеркавання на кангрэсе — гісторыя кнігадрукавання ў кантэксце сусветнай кніжнай культуры, кніжная спадчына Францішка Скарыны і яго пераемнікаў, развіццё беларускай мовы ў кантэксце распаўсюджвання кнігадрукавання, кніга і друкаванне — вопыт стагоддзяў і сучасныя рэаліі.
У межах кангрэса таксама будзе адкрыты міжнародны экспазіцыйны праект «Францішак Скарына і яго эпоха».
