Падчас агульнай аўдыенцыі Папа Леў IX нагадаў, што Другі Ватыканскі Сабор дапамог Касцёлу зноў адкрыць багацце літургіі, якое ўжо прысутнічала ў свядомасці першых хрысціян і вучэнні Айцоў Касцёла.
Ён падкрэсліў, што гэта не проста знешняя аправа сакрамэнтаў або набор цырымоній, слоў і жэстаў, устаноўленых чалавекам. Гэта спосаб, праз які вернікі атрымліваюць Божы дар і ўдзельнічаюць у таямніцах веры.
Выдавецтва Гродзенскай дыяцэзіі прэзентуе новае духоўна-асветніцкае выданне — «Святая Імша з Бібліяй у руках» Эдварда Шры ў перакладзе на рускую мову. Гэта выданне — падарожжа ў сэнс кожнага слова, праваднік у глыбіню таямніцы Божых дзеянняў. Разумеючы карані і сэнс кожнага рытуалу, мы лепш адчуваем і перажываем сутнасць святой Імшы.
«Для католікаў святая Імша з’яўляецца цэнтрам веры. Мы здзяйсняем яе кожны дзень. Мы ведаем усе адказы, усе жэсты. Але ці ведаем мы, што ўсё гэта азначае?» — гаворыцца ў анонсе да кнігі.
Доктар тэалогіі Эдвард Шры даследуе біблейскія карані слоў і жэстаў, якія выкарыстоўваюцца падчас літургіі, і ў даступнай форме тлумачыць іх глыбокае значэнне. Чытач нібы адпраўляецца ў біблейскі тур па святой Імшы, ад пачатковага знака крыжа да заключнага «Дзякуем Богу».
Змест кнігі складаецца з некалькіх частак, якія асобна разглядаюць пачатковыя абрады, літургію Слова і літургію Эўхарыстыі, а таксама заключныя абрады.
Аналізуючы іх праз прызму Бібліі, можна ў новым святле паглядзець на святую Імшу. Гэта дапаможа лепш зразумець глыбіню таго, што адбываецца падчас літургічных дзеянняў, і спасцігнуць значэнне таго, што мы гаворым і робім, удзельнічаючы ў гэтых таямніцах.
Нагадаем, што ў 2019 годзе ў выдавецтве Pro Christo выйшла 2-е, папраўленае выданне перакладу на беларускую мову кнігі Лукаша Кубяка «Святая Імша. 100 пытанняў і адказаў», у якой на падставе Святога Пісання, асноўных дакументаў Касцёла, шматлікіх крыніц па гісторыі літургічных абрадаў, а таксама каментарыяў айцоў Касцёла і святых аўтар тлумачыць тэалагічны сэнс і значэнне літургічных абрадаў і сімвалаў, літургічнага начыння і іншых сакральных прадметаў і малітваў.
