Ужо два месяцы ў Мінска-Магілёўскай архідыяцэзіі дзейнічае новы санктуарый Маці Божай Фацімскай, якім 13 мая арцыбіскуп Тадэвуш Кандрусевіч абвясціў жодзінскі касцёл.
Апекунамі санктуарыя з’яўляюцца ксяндзы марыяне. Кожны месяц у санктуарыі праходзяць фацімскія набажэнствы (кожны 13 дзень месяца, пачатак у 19.00). Набажэнства распачынаецца св. Імшой, пасля якой моляцца Нешпары, а таксама адбываецца адарацыя Найсвяцейшага Сакрамэнту і працэсія з фігурай Маці Божай Фацімскай.
Кусташ санктуарыя а. Міхаіл Цвячкоўскі МІС запрашае ўсіх вернікаў Мінска-Магілёўскай архідыяцэзіі і ўсёй Бларусі на фацімскія набажэнствы і працэсію з фігурай Маці Божай Фацімскай.
Паводле яго слоў, санктуарый ужо наведваюць пілігрымы — як індывідуальна, так і групай. У чэрвені сюды прыязджалі пілігрымы з мінскай парафіі Св. Яна Евангеліста і Св. Максімільяна Кольбэ.
«У санктурый можна прыехаць у любы дзень, — адзначае кусташ. — Трэба толькі загадзя папярэдзіць аб сваім прыездзе. Ёсць магчымасць споведзі і цэлебрацыі св. Імшы»
Тэлефон для сувязі: 8 029 136 52 89 (а. Міхал Цвячкоўскі MIC)
