6 снежня адзначаецца свята святога Мікалая, біскупа Мір Лікійскіх, аднаго з самых шанаваных святых ва ўсходняй хрысціянскай традыцыі.
Як паведамляецца на сайце грэка-каталіцкай парафіі святога праведнага Язэпа ў Мінску Svjazep.org, вернікі Беларускай Грэка-Каталіцкай Царквы ўрачыста ўшаноўваюць памяць гэтага святога Цудатворцы.
Сёлета свята ў гонар святога Мікалая прыпадае на пятніцу.
З гэтай нагоды Апостальскі адміністратар для грэка-католікаў у Беларусі архімандрыт Сяргей Гаек, на падставе канона 1536, п. 1 і п. 2 Кодэксу Канонаў Усходніх Цэрваў, удзяляе грэка-католікам у Беларусі на гэты дзень дыспенсацыю ад абавязку ўстрымання ад мясных страваў.
На католікаў лацінскага абраду дыспенсацыя не распаўсюджваецца.
Аднак у парафіях святога Мікалая, біскупа, у Геранёнах (Гродзенская дыяцэзія, Івейскі дэканат), Міры (Гродзенская дыяцэзія, Навагрудскі дэканат) і Свіры (Мінска-Магілёўская архідыяцэзія, Мядзельскі дэканат), дзе ў гэты дзень адзначаецца ўрачыстасць, няма абавязку ўстрымання ад мясных страваў.
