У першую гадавіну адыходу ў вечнасць Мітрапаліта Філарэта, Ганаровага Патрыяршага Экзарха ўсяе Беларусі, беларускія грэка-католікі ў духу міжканфесійнага дыялогу маліліся аб вечным жыцці для спачылага праваслаўнага іерарха.
Як паведамляецца на сайце грэка-каталіцкай парафіі святога Праведнага Язэпа ў Мінску svjazep.org, увечары 11 студзеня ў парафіяльным храме адбылася Боская Літургія, цэлебрацыю якой узначаліў Апостальскі візітатар для беларускіх грэка-католікаў архімандрыт Сяргей Гаек. Разам з грэка-каталіцкімі семінарыстамі святар маліўся за супакой душы памерлага Мітрапаліта Філарэта ў першую гадавіну яго адыходу ў вечнасць.
«Дзякуем Госпаду за архіпастырскае служэнне Мітрапаліта Філарэта, за ягоную хрысціянскую адкрытасць на міжканфесійны дыялог, які спрыяў пабудове адносінаў узаемнай павагі паміж грэка-католікамі і праваслаўнымі ў Беларусі. Ва ўдзячнай памяці захоўваю сустрэчы і размовы са святой памяці Высокапраасвяшчэным Уладыкам Філарэтам: у Беларусі і ў замежжы.
Узгадваю поўныя духоўнага натхнення словы, якія ён скіраваў мне пасля Боскай Літургіі, якую 20 лютага 2006 года служыў на мошчах свяціцеля Мікалая ў крыпце базылікі ў Бары: „Хрысціянскім іерархам трэба вучыцца з прыкладу святога Мікалая, як адважна служыць людзям словам і чынам; усім, хто да іх звяртаецца па дапамогу“», — прыводзіць грэка-каталіцкі парафіяльны сайт словы архімандрыта Гаека ў дзень пахавання Мітрапаліта Філарэта, што адбылося 15 студзеня 2021 года.
