1 жніўня ў санктуарыі Езуса Журботнага ў Росі (Гродзенская дыяцэзія, Ваўкавыскі дэканат) адбылася ўрачыстая святая Імша, якую ўзначаліў біскуп эмэрыт Аляксандр Кашкевіч, для пілігрымаў, якія сабраліся там у гэты дзень.
У старадаўнюю святыню, дзе знаходзіцца славутая ласкамі фігура Езуса Журботнага, прыйшлі пешыя пілігрымкі з Гродна (300 чалавек), Мастоў (200 чалавек) і Ваўкавыска (150 чалавек). Таксама ў індывідуальным парадку прыбылі пілігрымы з бліжэйшых мясцін, шмат людзей прыехала на ўласным транспарце.
Біскуп Аляксандр Кашкевіч падчас Эўхарыстыі маліўся за ўсіх прысутных, найперш за тых, хто прыйшоў у пешых пілігрымках. Удзельнікі Імшы, якіх сёлета было вельмі шмат, маліліся ў сваіх інтэнцыях.
У гаміліі біскуп Аляксандр падкрэсліў, што ў Росі «стагоддзямі насустрач чалавечай слабасці і пакутам выходзіць наш Збаўца і робіць гэта ў вельмі красамоўным знаку — у постаці, якая паказвае Яго як Журботнага».
Іерарх адзначыў, што прысутнасць шматлікіх паломнікаў у гэтым месцы, асвячоным малітвамі, пакутамі і ахвярай многіх пакаленняў хрысціян, «з’яўляецца сведчаннем нашай веры і жадання знаходзіцца побач з Хрыстом».
«Многія з вас пераадолелі дзясяткі кіламетраў, ідучы пешшу ў спякоту і дождж, церпячы нязручнасці і нягоды пілігрымкі, з ружанцам у руках, з малітвай і песняй на вуснах», — дадаў першы ардынарый Гродзенскай дыяцэзіі.
Біскуп заклікаў усіх прысутных трываць пры Хрысце, «бо толькі ў Ім наша надзея, толькі Ён наша дарога, праўда і жыццё, толькі ў Ім ёсць збаўленне вечнае».
«Як вучні Езуса Хрыста давайце пойдзем за Ім шляхам крыжа, памятаючы, што ў канцы гэтага шляху нас чакае не паражэнне, а найвялікшая і самая выдатная перамога — уваскрасенне»,
— дадаў біскуп Аляксандр.
Ад імя біскупа Гродзенскага Уладзіміра Гуляя іерарх падзякаваў усім пілігрымам за сведчанне веры і любоў да Бога і Касцёла і пажадаў, каб гэтае пілігрымаванне прынесла шчодры плён у іх жыцці. Таксама біскуп выказаў кусташу санктуарыя ксяндзу каноніку Чэславу Паўлюкевічу падзяку за цёплы прыём і гасціннасць.
Пасля святой Імшы была магчымасць індывідуальнай малітвы, затым адбыліся адарацыя Найсвяцейшага Сакрамэнту і канферэнцыя.
