З 31 ліпеня па 1 жніўня ў Навагрудку (Гродзенская дыяцэзія) адзначылі 83-ю гадавіну мучаніцкай смерці бласлаўлёных сясцёр назарэтанак, якія загінулі ў 1943 годзе ў час Другой сусветнай вайны.
Сёлета прайшло 83 гады з таго дня, як сёстры Марыя Стэла і 10 яе паплечніц, якія служылі ў Навагрудку, былі расстраляны нацыстамі.
Урачыстасці распачаліся святой Імшой у Батароўскім лесе. Эўхарыстыю на месцы мучаніцкай смерці манахінь узначаліў біскуп эмерыт Аляксандр Кашкевіч. У літургіі ўдзельнічалі таксама іншыя святары, манаскія сёстры, удзельнікі пешых пілігрымак з Ліды, Дзятлава (Гродзенская дыяцэзія) і Новай Мышы (Пінская дыяцэзія), з якой пілігрымка ў Навагрудак на ўспамін смерці бласлаўлёных мучаніц здзяйсняецца з 1997 года.
На святой Імшы аддалі пашану мучаніцам, памаліліся аб веры і адвазе для будучых пакаленняў і аб міры ва ўсім свеце.
У гаміліі ксёндз Ян Раманоўскі, рэктар Міждыяцэзіяльнай вышэйшай духоўнай семінарыі ў Гродне, падкрэсліў цану ахвяры, якую прынеслі манахіні, ахвяраваўшы сваё жыццё за бацькаў сем’яў і жыхароў Навагрудка. Святар заклікаў па прыкладзе бласлаўлёных сясцёр з мужнасцю сведчыць аб Хрысце.
Напрыканцы Эўхарыстыі біскуп Аляксандр падзякаваў усім прысутным, а асабліва пілігрымам, якія прыбылі ў пешых паломніцтвах, за іх сведчанне веры і гераізм, з якім смела ішлі па дарогах нашай краіны.
Затым у касцёле Перамянення Пана, што з’яўляецца санктуарыем бласлаўлёных сясцёр мучаніц, адбылося начное чуванне, якое ўключала адарацыю Найсвяцейшага Сакрамэнту, канферэнцыю, Ружанец і Крыжовы шлях.
Урачыстасці завяршыліся ранішняй святой Імшой, якая распачалася ў 4.30 — прыблізны час мучаніцкай смерці сясцёр назарэтанак.
