2 красавіка ўвечары ў мінскім архікатэдральным касцёле Імя Найсвяцейшай Панны Марыі адбылася святая Імша Вячэры Пана, якая транслявалася на беларускім тэлебачанні.
Цэлебрацыю Эўхарыстыі на ўспамін Апошняй Вячэры Езуса Хрыста ўзначаліў арцыбіскуп Юзаф Станеўскі, Мітрапаліт Мінска-Магілёўскі.
На пачатку Імшы арцыпастыр Мінска-Магілёўскай архідыяцэзіі заклікаў прысутных да удзячнасці «за тое, што мы маем куды і да каго прыйсці і з кім весці дылог», маючы на ўвазе канкрэтны акт любові Бога да чалавека ў дзень устанаўлення сакрамэнтаў Эўхарыстыі і пасвячэння і сам Вячэрнік — дарагі сэрцам вернікаў архікатэдральны касцёл.
Пасля гэтага моладзь мінскай архікатэдры павіншавала арцыбіскупа з днём святарства.
У гаміліі Мітрапаліт адзначыў, што падзеі Вялікага чацвярга маюць для нас выключнае значэнне.
— звярнуўся да духоўнага сэнсу евангельскіх падзей прамоўца.
Тое, што Езус абраў хлеб і віно, каб яны пераўтварыліся ў Яго Цела і Кроў, таксама невыпадкова — менавіта яны былі асноўным спажыткам у габрэйскім грамадстве тых часоў. Аднак у Хрысце яны набылі новае значэнне.
«Сілкуючыся хлебам, які стаў Целам Хрыстовым, мы ўмацоўваемся ў веры, атрымліваем духоўную сілу, каб супрацьстаяць штодзённым цяжкасцям і асабістым слабасцям, узбройваемся сілай барацьбы са злом і грахом і атрымліваем мужнасць, каб адважна сведчыць пра наша сяброўства з Езусам Хрыстом. Сілкуючыся Яго Целам і Крывёю, мы вучымся любіць, як Езус, прабачаць, як Езус, і служыць іншым, як Езус», — навучаў аб значэнні Эўхарыстыі арцыпастыр.
Мітрапаліт адзначыў важныя аспекты самага галоўнага сакрамэнту:
«Перад святам Пасхі Езус, ведаючы, што прыйшла Ягоная гадзіна перайсці з гэтага свету да Айца, палюбіўшы сваіх у свеце, дарэшты палюбіў іх (Ян 13,1)» — гэтыя словы з Евангелля паводле святога Яна сведчаць аб невымоўнай любові Бога да чалавека і з’яўляюцца, на думку арцыбіскупа, заахвотай да глыбокага перажывання лучнасці з Езусам у святой Камуніі.
«У кожнай святой Імшы, на якой мы прысутнічаем, нашыя чаканні спраўджваюцца. Езус прыходзіць да нас, каб мы маглі пазнаць Яго Імя, Яго Аблічча, каб мы маглі адчуць Яго прысутнасць і бясконцую міласэрнасць. Таму няхай удзел у святой Імшы не будзе для нас абавязкам, але шанцам, дадзеным нам Богам», — падзяліўся настаўленнем Папы Францішка арцыбіскуп.
Набліжаючы вернікам каштоўнасць дару Эўхарыстыі, прамоўца працытаваў таксама словы Папы Льва XIV: «Калі мы дорым падарунак, нават невялікі, але ў межах нашых магчымасцей, і бачым, што той, хто яго атрымлівае, цэніць яго, то якія мы шчаслівыя! І адчуваем, што гэты падарунак, якім бы простым, ён ні быў, яшчэ глыбей аб’ядноўвае нас з тымі, каго мы любім. У Эўхарыстыі менавіта гэта адбываецца паміж намі і Богам».
Сённяшняе Евангелле, нагадаў арцыпастыр, кажа аб тым, што перад устанаўленнем Эўхарыстыі Езус абмыў ногі вучням, і для нас гэта азначае, што прыступаць да Эўхарыстыі неабходна чыстымі духам і целам, поўнымі даверу да Пана Бога і ў пакоры.
— малітоўным заклікам завяршыў гамілію арцыбіскуп Станеўскі.
Літургія скончылася ў поўнай цішыні. Найсвяцейшы Сакрамэнт на ўспамін арышту Хрыста пасля Яго малітвы ў Аліўным садзе быў перанесены ў цямніцу. На працягу пэўнага часу для вернікаў была магчымасць адарыцыі Пана Езуса.
