Увосень 1999 года на ахвяраванні вернікаў парафіі Унебаўзяцця Найсвяцейшай Панны Марыі ў Мёрах (Віцебская дыяцэзія) была выраблена фігура Маці Божай Ратавальніцы тонучых.
З нагоды 25-гадовага юбілею незвычайнай фігуры, адзінай такой у Беларусі, на парафіяльным сайце Kascelmery.by апавядаецца яе не менш незвычайная гісторыя.
Першапачаткова фігура была ўсталявана на цвінтары касцёла, а цяпер упрыгожвае набярэжную Мёрскага возера і з’яўляецца візітоўкай горада.
Першая фігура Маці Божай была ўсталявана над возерам па ініцыятыве ксяндза Рамуальда Свіркоўскага.
Яе ўрачыста благаславілі 8 верасня 1929 года. Фігура з белага мармуру, якая размяшчалася на штучна створаным астраўку, велічна і прыгожа ўзвышалася над водамі. На п’едэстале залатымі літарамі быў зроблены надпіс: «Каралева Польшчы, маліся за нас. 1918–1928».
Аднак тая фігура прастаяла нядоўга: у часы ваяўнічага атэізму яе разбілі на кавалкі і ссунулі бульдозерам у возера. Пра гэта піша краязнаўца Вітольд Ермалёнак «Святыня над возерам».
Калі ў сярэдзіне 80-х гадоў мінулага стагоддзя ў Мёры прыехаў працаваць ксёндз Уладас Пятрайціс і пачуў гісторыю помніка, адразу запаліўся ідэяй устанавіць новую фігуру. Вітольд Ермалёнак узгадвае: «У 1997 годзе да мяне звярнуўся ксёндз Уладас з просьбай дапамагчы высветліць, як выглядала ранейшая фігура Маці Божай, бо знайсці фотаздымак на той час не ўдалося. Я не мясцовы, таму пачаў распытваць людзей. І якая цікавая рэч — людская памяць…
Большасць старажылаў дакладна не памяталі, як выглядаў помнік, усе апісвалі яго па-рознаму. Таму было прынята рашэнне зрабіць такую скульптуру, якую прапануе майстар Ігар Голубеў», — узгадвае краязнаўца.
Працы зацягнуліся амаль на два гады. Адна з прычын — цяжкасці з разлікам. Парафіяне ахвяравалі грошы, але кошт помніка пастаянна ўзрастаў, бо была моцная інфляцыя. Адлівалі фігуру з бронзы на Мінскім трактарным заводзе.
У верасні 1999 года скульптура Маці Божай масай 3 тоны і вышынёй 4,3 метры нарэшце прыбыла ў Мёры.
Па задуме ксяндза Уладаса Пятрайціса, скульптурны комплекс павінен быў размяшчацца над возерам, але ўлады не далі на гэта дазволу. Тады фігуру часова ўстанавілі на цвінтары пры касцёле.
Першапачаткова фігура мела назву Маці Божай Радзіліцы, але потым ксёндз Уладас даў ёй другую назву — Маці Божая Ратавальніца тонучых. Ён тлумачыў, што Маці Божая ратуе не толькі тых, хто фізічна тоне ў вадзе, але і тых, хто патанае ў грахах.
У 2004 годзе тагачасны пробашч парафіі ксёндз Крыштаф Мянкіна звярнуўся да ўладаў з просьбай усталяваць фігуру на возеры, аднак просьба зноў была адхілена.
У ходзе правядзення добраўпарадкавання прыкасцёльнай тэрыторыі да святкавання 100-годдзя святыні, скульптуру вырашылі змясціць перад галоўным уваходам у касцёл.
12 лістапада 2004 года арцыбіскуп Чэнстахоўскі Станіслаў Новак асвяціў фігуру Маці Божай, якая доўгі час вітала і благаслаўляла тых, хто прыходзіў у святыню.
Сітуацыя канчаткова вырашылася ў 2017 годзе.
Ксёндз Крыштаф успамінае: «Я зноў вырашыў звярнуцца да раённых уладаў з прапановай змясціць скульптуру Маці Божай над возерам, як гэта было раней. І на гэты раз мае словы знайшлі водгук. Старшыня райвыканкама Ігар Кузняцоў не толькі падтрымаў ідэю, але і аказаў садзеянне ў вырашэнні арганізацыйных, фінансавых і практычных пытанняў. Дапамогу ў падрыхтоўцы праекта і правядзенні пэўных работ аказаў інжынер Аляксандр Грыбач.
Дзякуючы працы неабыякавых людзей скульптура была ўстаноўлена. Няхай Пан Бог бласлаўляе ўсіх, хто прычыніўся да гэтай пачэснай справы», — кажа святар.
4 кастрычніка ўсе працы былі завершаны, а 12 лістапада біскуп Аляксандр Яшэўскі SDB у прысутнасці мясцовых уладаў і шматлікіх вернікаў асвяціў фігуру Маці Божай Ратавальніцы тонучых. Гэта падзея аднавіла гістарычную справядлівасць.
Цяпер фігура Маці Божай з маленькім Езусам на руках з’яўляецца адным з сімвалаў горада Мёры.
