Біскупы Беларусі ў межах духоўных практыкаванняў, якія яны перажываюць у Пінску, 6 лістапада наведалі некаторыя мясціны, звязаныя з духоўнай спадчынай Пінскага рэгіёна.
Спачатку беларускія біскупы разам з рэкалекцыяністам, дапаможным біскупам архідыяцэзіі Маці Божай у Маскве Мікалаем Дубініным OFMConv, наведалі гарадскі некропаль Пінска — найстарэйшыя могілкі на вуліцы Спакойнай.
Там каля памятнага крыжа на месцы былой капліцы Маці Божай Балеснай яны памаліліся за спачылых біскупаў, святароў, кансэкраваных асобаў, а таксама за свецкіх вернікаў, якія адышлі ў вечнасць.
Таксама іерархі памаліліся каля магіл бацькоў біскупа Пінскага Казіміра Букрабы (†1946), а таксама каля пахаванняў бліжэйшых супрацоўнікаў Слугі Божага біскупа Зыгмунта Лазінскага: легендарных святароў ксяндза прэлата доктара Вітальда Чачота і ксяндза прэлата Лявона Святаполк-Мірскага, выкладчыкаў каталіцкай Духоўнай акадэміі ў Санкт-Пецярбургу на мяжы ХІХ–ХХ стагоддзяў, якія стаялі ля вытокаў Люблінскага каталіцкага ўніверсітэта, а таксама дапамагалі ў арганізацыі курыяльных структур Пінскай дыяцэзіі больш за сто гадоў таму.
Біскупы наведалі таксама знакамітую «хатку кардынала» — дом у Пінску на вуліцы Шаўчэнкі 12, дзе на працягу доўгіх дзесяцігоддзяў свайго служэння жыў першы і адзіны беларускі кардынал Казімір Свёнтэк, першы Мітрапаліт Мінгска-Магілёўскі і першы Старшыня Канферэнцыі Каталіцкіх Біскупаў у Беларусі.
У маленькім дамку, а дакладней, у яго палове, якую займаў Сведка веры, усё засталося так, як было пры яго жыцці.
Асаблівым момантам малітвы і роздуму стала для іерархаў наведванне дыяцэзіяльнага санктуарыя Маці Божай Каралевы Палесся, Апякункі Пінскай дыяцэзіі, у мястэчку Лагішын.
Пасля малітвы ў санктуарыі біскупы завіталі ў лагішынскі Дом міласэрнасці для пажылых людзей. Там іерархі сустрэліся з супрацоўнікамі і пастаяльцамі ўстановы і ўдзялілі ім сваё пастырскае благаслаўленне.
