5 лістапада ў будынку былой Міждыяцэзіяльнай вышэйшай духоўнай семінарыі імя святога Тамаша Аквінскага ў Пінску распачаліся рэкалекцыі для каталіцкіх біскупаў Беларусі.
Такія адмысловыя духоўныя практыкаванні для епіскапату ў нашай краіне праходзяць упершыню. Праводзіць рэкалекцыі, у якіх бяруць удзел усе каталіцкія біскупы Беларусі і Апостальскі адміністратар для грэка-католікаў у Беларусі архімандрыт Сяргей Гаек, дапаможны біскуп архідыяцэзіі Маці Божай у Маскве Мікалай Дубінін OFMConv.
Тэма рэкалекцый натхнёная старазавпаветнай кніга Прыпавесцяў Саламона: «Дай настаўленне мудраму, і ён будзе яшчэ мудрэйшым» (пар. Прып 9, 9).
Як патлумачыў Catholic.by Старшыня Канферэнцыі Каталіцкіх Біскупаў у Беларусі арцыбіскуп Юзаф Станеўскі, Мітрапаліт Мінска-Магілёўскі, Пінск нездарма быў выбраны месцам правядзення першых рэкалекцый для беларускіх іерархаў.
«У дні, калі Касцёл асаблівым чынам моліцца за памерлых, у тым ліку і за спачылае духавенства, мы вырашылі сабрацца менавіта ў Пінску, дзе ў крыпце пад катэдральным касцёлам пахаваны першы Старшыня беларускага епіскапату святой памяці кардынал Казімір Свёнтэк», — сказаў арцыбіскуп Станеўскі.
Іерарх дадаў, што пасля заканчэння рэкалекцый, у пятніцу 8 лістапада, тут жа ў Пінску плануецца правесці пасяджэнне Канферэнцыі Каталіцкіх Біскупаў у Беларусі, каб падкрэсліць сувязь і адзінства, а таксама пераемнасць мясцовай касцёльнай іерархіі.
«Молячыся у крыпце, дзе спачываюць парэшткі кардынала Свёнтка, мы вяртаемся да вытокаў структур Касцёла на Беларусі», — адзначыў Старшыня епіскапату.
Акрамя таго, арцыбіскуп Юзаф Станеўскі заўважыў, што ў час, калі пінская семінарыя ўжо некалькі гадоў пустуе, паколькі няма кандыдатаў, тут сабраліся біскупы з усёй Беларусі, каб маліцца ў тым ліку і аб пакліканнях.
