20 кастрычніка ў архікатэдральным касцёле Найсвяцейшага Імя Марыі ў Мінску прайшла святочная сустрэча для шматдзетных сем’яў з нагоды кастрычніцкіх святаў Дня маці і Дня бацькі, якія аб’ядноўвае Тыдзень бацькоўскай любові.
Сустрэча была арганізаваная парафіяльнай суполкай дабрачыннага каталіцкага таварыства Caritas па благаслаўленні пробашча сталічнай катэдральнай ксяндза каноніка Дзмітрыя Пухальскага.
Для бацькоў і іх дзетак была падрыхтаваная цікавая інтэрактыўная праграма і салодкі пачастунак у цёплай сямейнай атмасферы.
Дарослыя змаглі паўзаемадзейнічаць з прафесійным лагапедам Марынай Пракаповіч, падыскутаваць, абмяняцца думкамі і задаць свае пытанні, усталяваць узаемны кантакт.
У гэты час дзеці былі даручаны валанцёрам Сaritas, а таксама для іх выступілі прафесійныя аніматары з навуковым шоу, якое дзецям прынесла не толькі яскравыя эмоцыі, але і пэўныя веды.
З віншаваннямі на мерапрыемства завіталі іерархі: Мітрапаліт Мінска-Магілёўскі арцыбіскуп Юзаф Станеўскі і арцыбіскуп эмэрыт Тадэвуш Кандрусевіч, візіт якіх стаў таксама падарункам для прысутных.
Ксёндз Дзмітрый Пухальскі разам з парафіяльнай суполкай Сaritas дзякуе ўсім, хто адгукнуўся на запрашэнне і ўзяў удзел у мерапрыемстве, а таксама дапамагаў у арганізацыі свята. Пробашч і валанцёры спадзяюцца на актыўнае ўзаемадзеянне парафіянаў у правядзенні наступных акцый.
