У кляштары айцоў францішканаў у Удзеле (Віцебская дыяцэзія, Глыбоцкі дэканат) з 4 па 6 кастрычніка праходзіла сустрэча для моладзі «Ўік-энд з Марыяй».
Гэта быў першы ў гэтым сезоне ўік-энд 13+, які сабраў юнакоў і дзяўчат з розных мясцін, каб разам паглыбіцца ў веру і адчуць атмасферу супольнасці. Госцем сустрэчы стаў адказны за душпастырства моладзі Віцебскай дыяцэзіі ксёндз Алег Хмылко з Полацка.
Разам з ім удзельнікі ўік-энду разаважалі над тэмай, прысвечанай першай Божай запаведзі: «Не май іншых багоў, апроч Мяне».
У сваіх канферэнцыях ксёндз Алег закрануў найбольш важныя пытанні, якія датычацца веры і вернасці Богу ў сучасным свеце. Праз разважанні, малітвы і дыскусіі ўдзельнікі мелі магчымасць прааналізаваць свае прыярытэты, зразумець, як зберагчы духоўныя каштоўнасці і даверыцца аўтарытэту Бога ў сваім жыцці.
Асаблівымі сталі моманты адарацыі Найсвяцейшага Сакраманту, святая Імша з Фацімскім ружанцам і супольныя малітвы. Юнакі і дзяўчаты таксама мелі час на асабістыя разважанні і сустрэчы з Богам сам-насам у цішыні «пустыні»: своеасаблівага духоўнага практыкавання, уласцівага манаскай духоўнасці.
Падчас ўік-энду было месца і для інтэграцыйных момантаў, якія дапамагаюць стварыць сапраўдную супольнасць: вечары ля каміна, час для адпачынку і размоў.
Удзельнікі мелі магчымасць лепш пазнаёміцца адзін з адным, падзяліцца сваімі гісторыямі і досведам, а таксама паказалі цікавыя сцэнкі на розныя жыццёвыя сітуацыі, якія яны самі і прыдумалі.
Гэты ўік-энд у Удзеле стаў для ўсіх удзельнікаў не толькі часам малітвы і духоўнага паглыблення, але таксама магчымасцю адчуць цеплыню братэрства і падтрымкі супольнасці.
Як сведчылі самі юнакі і дзяўчаты перад вяртаннем дадому, тут кожны атрымаў новыя сілы і натхненне.
Айцы францішкане запрашаюць моладзь да ўдзелу ў наступных сустрэчах, каб разам будаваць супольнасць, якая шукае Бога і знаходзіць Яго ў кожным моманце жыцця.
