8 верасня, у свята Нараджэння Найсвяцейшай Панны Марыі, у санктуарыі Маці Божай Браслаўскай упершыню адзначылі ўрачыстасць тытулу базылікі.
Вядома, парафіяльны адпуст ў браслаўскім касцёле Нараджэння Маці Божай адзначаўся ў гэты дзень і раней, аднак упершыню яго святкавалі менавіта як урачыстасць тытулу базылікі.
Аб наданні святыні тытулу малой базылікі было абвешчана менш за месяц таму, 17 жніўня, падчас цэнтральнай святой Імшы фэсту ў гонар Маці Божай Браслаўскай, Валадаркі азёраў, які адбываўся ў Браславе ў год 25-гадовага юбілею Віцебскай дыяцэзіі.
Адпаведны дакумент ватыканскай Дыкастэрыі Божага Культу і Дысцыпліны Сакрамэнтаў быў выдадзены 23 мая 2024 года.
З нагоды тытулярнай урачыстасці пасля святой Імшы на 11 гадзін адбылася Эўхарыстычная працэсія вакол базылікі.
У гэты дзень кожны мог атрымаць тут поўны адпуст на звычайных умовах.
