![](/3/images/news/2024/09/2024-09-04-Sapockina.jpg)
2 верасня арцыбіскуп эмэрыт Тадэвуш Кандрусевіч у межах сваёй паездкі ў Гродзенскую дыяцэзію наведаў Сапоцкін, невялікае мястэчка каля Гродна, цэнтр Сапоцкінскага дэканата.
Там заслужаны іерарх памаліўся разам са святарамі, якія перажываюць рэкалекцыі, а таксама ўзначаліў арганізацыйную сустрэчу па падрыхтоўцы навуковай канферэнцыі аб новай евангелізацыі.
Арцыбіскуп Кандрусевіч узначаліў цэлебрацыю святую Імшу ў сапоцкінскім парафіяльным касцёле Унебаўзяцця Найсвяцейшай Панны Марыі для святароў Гродзенскай дыяцэзіі, якія распачалі штогадовыя святарскія духоўныя практыкаванні ў рэкалекцыйным доме Caritas Гродзенскай дыяцэзіі.
Пасля святой Імшы ў зале рэкалекцыйнага дома адбылася арганізацыйная сустрэча, якая мела на мэце каардынацыю намаганняў па арганізацыі навуковай канферэнцыі, прысвечанай пастырскаму году свецкіх і Сіноду біскупаў пра сінадальнасць, тэма якой: «Новая Евангелізацыя ў кантэксце дзейнасці Каталіцкага Касцёла ў Беларусі».
У сустрэчы ўзялі ўдзел віцэ-канцлер курыі Гродзенскай дыяцэзіі ксёндз канонік Антоній Грэмза, намеснік дырэктара Гродзенскага тэалагічнага каледжа імя святога Казіміра ксёндз Анджэй Шчупал CSsR, рэктар Міждыяцэзіяльнай Вышэйшай духоўнай семінарыі ў Гродне ксёндз канонік Віталь Вайцяхоўскі, эканом семінарыі ксёндз Валерый Аброшка, а таксама ксёндз Павел Эйсмант, асабісты сакратар арцыбіскупа Кандрусевіча. Узначаліў арганізацыйную сустрэчу заслужаны іерарх.
На сустрэчы былі абмеркаваныя некаторыя арганізацыйныя пытанні, а таксама акрэслены тэмы выступленняў і дакладчыкі. Была зацверджана праграма навуковай канферэнцыі, якая адбудзецца ў суботу 28 верасня ў будынку Міждыяцэзіяльнай Вышэйшай духоўнай семінарыі ў Гродне.