![](/3/images/news/2024/08/2024-08-27-Sustrecha-katehetau-Udzela3.jpg)
У суботу 24 жніўня, ва ўспамін святога апостала Барталамея, у касцёле Беззаганнага Зачацця Найсвяцейшай Панны Марыі ў Удзеле (Глыбоцкі дэканат) прайшла сустрэча катэхетаў Віцебскай дыяцэзіі.
Як паведамляецца на партале Сatholicnews.by, тэмай сустрэчы стала «Хрысціянскае выхаванне дзяцей і моладзі».
Сустрэча рапачалася святой Імшой, цэлебрацыю якой узначаліў біскуп Віцебскі Алег Буткевіч. У прамоўленай гаміліі іерарх перадусім нагадаў катэхетам пра годнасць той місіі, якую яны выконваюць у выхаванні дзяцей і моладзі.
«Перш за ўсё адказнасць за духоўную фармацыю дзяцей ляжыць на святарах, але, дзякуй Богу, яны маюць у гэтым памочнікаў у асобе катэхетаў. Гэта тыя людзі, якія, нягледзечы на свае штодзённыя абавязкі, адгукнуліся на Божы заклік быць памочнікамі ў Касцёле», — заўважыў біскуп Буткевіч.
Пастыр Віцебскай дыяцэзіі таксама адзначыў неабходнасць паглыблення адносінаў з Богам і для саміх катэхетаў. «Як апостал Барталамей, пра якога сёння нам кажа Евангелле, запалаў верай праз сустрэчу з Езусам, жывым Богам, так і мы, духоўныя асобы, і вы, катэхеты, павінны няспынна шукаць гэтай сустрэчы ў нашым паўсёдзённым жыцці.
Толькі так, самі запалаўшыся верай, мы будзем здольныя перадаваць яе іншым», — падкрэсліў іерарх.
Пасля святой Імшы адбылася першая з дзвюх канферэнцый, якія праводзіў Уладзіслаў Валаховіч, доктар біблійнай тэалогіі, дырэктар фонда ў абарону жыцця «Адкрытыя сэрцы». Падчас гэтай канферэнцыі спікер акрэсліў галоўныя праблемы і пагрозы ў сучасным выхаванні дзяцей і моладзі, сярод якіх дэгуманізацыя, ЛГБТ-прапаганда і гендарная ідэалогія, празмернае і бязмэтавае карыстанне інтэрнэтам.
Паміж канферэнцыямі быў арганізаваны перапынак на каву і невялікі пачастунак, падчас якога можна было адпачыць на свежым паветры ці абмеркаваць надыходзячы навучальны год. Таксама была арганізавана своеасабліва экскурсія, падчас якой катэхеты разам са святарамі і біскупам наведалі будоўлю рэкалекцыйнага дома «Сяліба Беззаганнай» і памаліліся за яго будаўнікоў і валанцёраў.
Другая канферэнцыя была прысвечана пошуку адказаў на вызначаныя раней праблемы. Цэнтральнай часткай разважанняў стала вяртанне чалавеку яго чалавечага аблічча праз адзенне і мову, а таксама здольнасцяў праз незалежную ад лічбавай прасторы творчасць і працу. Таксама падчас канферэнцыі Уладзіслаў Валаховіч як шматдзетны бацька падзяліўся ўласным вопытам выхавання дзяцей у сям’і.