Старшыня ККББ арцыбіскуп Юзаф Станеўскі кіруе віншаванні настаўнікам, катэхетам, вучням і ўсім супрацоўнікам сферы адукацыі з нагоды пачатку новага навучальнага і катэхетычнага года.
Паважаныя настаўнікі і вучні, педагогі і выхаваўцы, браты і сёстры,
З пачаткам новага навучальнага года заканчваюцца летнія канікулы, час, цягам якога — у большай ці меншай ступені — у кожнага з вас было больш «вольнага» часу, калі вы маглі рабіць тое, што вам падабаецца. Асабліва для вас, дзеці, лета — гэта час забаў, гульняў, сустрэч з сябрамі, наведвання незнаёмых месцаў. Час, які можна назваць «незвычайным» у параўнанні са звычайнасцю паўсядзённага жыцця.
Але цяпер зноў пачынаецца звычайны час, які складаецца са школьных абавязкаў, урокаў, якія трэба падрыхтаваць, кніг, якія трэба вывучыць, раскладу заняткаў і дня, калег ці аднакласнікаў, якіх мы не выбіралі і якія нам могуць падабацца ці не. І гэта датычыцца ўсіх: вучняў, настаўнікаў, школьнага персаналу. З іншага боку, калі мы ўважліва падумаем, само жыццё складаецца амаль цалкам з абставін, абавязкаў, сітуацый, з якімі трэба сутыкнуцца, якія ў большасці выпадкаў мы не выбіралі; нават людзі, якія акружаюць нас штодня, часта не выбіраюцца намі, а «дадзеныя» нам у час, у якім Бог паклікаў нас да жыцця. Калі мы на хвіліну задумаемся, нават само наша існаванне складаецца з аспектаў, якія не залежаць ад нашай волі, а якія мы «атрымалі»: месца, дзе мы нарадзіліся, наша сям’я, наш характар, нашы здольнасці ці абмежаванні, само наша цела. Справядліва існуе выказванне: чалавек не мае ўплыву на месца і час свайго нараджэння, аднак ён мае ўплыў на тое, чым напаўняе час свайго вандравання зямным шляхам.
Я жыву ў цяперашнім моманце, у час, у якім Бог паклікаў мяне і напаўняю яго любоўю. Выкарыстоўваю магчымасці, якія з’яўляюцца кожны дзень, каб выконваць звычайныя дзеянні незвычайным чынам. Звычайнае становіцца незвычайным, заахвочвае нас адкрыць, што ў нашых адносінах з чалавекам, кожнай рэччу або абставінамі існуе магчымасць кахання і свабоды.
Мае дарагія сябры. Катэхеты і Настаўнікі. Бацькі і вучні. Працаўнікі сферы адукацыі. Браты і сёстры.
Жадаю вам адчуваць паўнату жыцця ў дробязях кожнага дня, інтэнсіўна перажываць кожны досвед, шукаць дабро для сябе і іншых, тое, што прыносіць сапраўдную радасць, а не толькі добрую адзнаку.
Жадаю ўсім вам з нагоды новага навучальнага 2025/2026 года, каб вашы дні сталі сапраўды «вялікімі».
На заканчэнне дазвольце прыгадаць біблійную мудрасць у пажаданнях: «Няхай благаслаўляе цябе Пан і аберагае цябе! Няхай Пан распраменіць сваё аблічча над табою і адорыць цябе ласкай. Няхай Пан скіруе на цябе свой погляд і адорыць цябе мірам» (Ліч 6, 24-26).
З благаслаўленнем
✠ Арцыбіскуп Юзаф Станеўскі
Вучань і настаўнік
