У перыяд падрыхтоўкі дзяцей да новага навучальнага года валанцёры парафіяльнай суполкі Сaritas, якая дзейнічае пры катэдральным касцёле Найсвяцейшага Імя Марыі ў Мінску, 18 жніўня арганізавалі кірмаш узаемадапамогі «Разам у школу».
На пачатку мерапрыемства пробашч сталічнай катэдральнай парафіі ксёндз канонік Дзмітрый Пухальскі благаславіў валанцёраў на добрую справу і плённую працу, а дыякан Аляксандр Шыманскі дапамог у арганізацыі і правядзенні дабрачыннай акцыі.
Больш чым за месяц да кірмашу ў парафіі быў аб’яўлены збор школьных прылад, якія людзі маглі ахвяраваць для далейшай іх рэалізацыі на бясплатным кірмашы. У дзень правядзення мерапрыемства кожны, хто звярнуўся, мог атрымаць для сваіх дзетак неабходныя для школы прылады.
На кірмашы можна было набыць розныя патрэбныя школьнікам рэчы: лінейкі, алоўкі, сшыткі, а таксама пластылін, цацкі, кнігі, абутак і адзенне.
Кожны ахвотны меў магчымасць паўдзельнічаць у бясплатнай латарэі, у якой разыгрываліся школьныя заплечнікі і дзіцячыя настольныя гульні. Была аформлена зона адпачынку для дзетак, дзе можна было памаляваць, пагуляць з мяккімі цацкамі і ў настолкі. Тут жа валанцёры надзімалі фігурныя паветраныя шарыкі, рабілі з іх кветкі і жывёл і дарылі дзецям. Яны дапамагалі падабраць і спакаваць патрэбныя прылады, а таксама проста дзяліліся сваімі ўсмешкамі і адкрытымі сэрцамі ў шчырых гутарках.
Арганізатары кірмашу разлічваюць на тое, што праз падобныя акцыі вернікі могуць адчуць шчырую ўзаемную падтрымку адзін аднаго, а гэта робіць парафію сапраўднай сям’ёй, дзе ўсе падзяляюць супольны клопат.
Ксёндз Дзмітрый Пухальскі разам з парафіяльным Caritas дзякуе ўсім, хто нейкім чынам далучыўся да правядзення дабрачыннай акцыі; тым, хто ахвяраваў рэчы, сродкі, свой час і малітву, а таксама тым, хто завітаў і ўзяў удзел у мерапрыемстве.
