15 жніўня, калі ў Касцёле адзначаецца ўрачыстасць Унебаўзяцця Найсвяцейшай Панны Марыі, вернікі парафіі Божага Цела ў старадаўнім Нясвіжы (Мінска-Магілёўская архідыяцэзія) падрыхтавалі адмысловую працэсію з дарамі.
З урачыстасцю звязаны звычай дажынак, або благаслаўлення снапоў і пладоў сёлетняга ўраджаю, а таксама зёлак, і таму свята часам называюць Маці Божай Зельнай.
Да гэтага дня ў нясвіжскай парафіі рыхтаваліся асаблівым чынам. Сёстры Яніна і Галіна з кангрэгацыі Місіянерак Хрыста Валадара, якія нясуць служэнне ў парафіі, заўсёды напоўненыя творчымі задумамі і маюць здольнасць натхніць імі тых, хто побач. Вернікі рознага ўзросту на чале з валанцёрамі парафіяльнага Caritas падрыхтавалі прыгожыя кошыкі, дэкаратыўныя вазочкі і напоўнілі іх агароднінай, садавіной, зёлкамі, кветкамі.
Падчас святой Імшы, цэлебрацыю якой узначаліў ксёндз канонік Пётр Шарко, дэкан Нясвіжскі, дары новага ўраджаю разам з вялікім караваем прынеслі да алтара. Жыхары вёскі Малева стварылі цудоўную кампазіцыю ў форме сэрца з каласоў жыта, агародніны і кветак.
Сумесная справа дала асаблівае пачуццё еднасці і саўдзелу.
У гэты дзень сёстры Галіна і Яніна прымалі віншаванні з нагоды чарговай гадавіны з часу вечных манаскіх абяцанняў.
Як прызнаюцца нясвіжскія вернікі, супольная малітва, благаслаўленне кветак, зёлак і дароў новага ўраджаю, падзяка Богу і Найсвяцейшай Панне Марыі за сабраны ўраджай дала магчымасць у чарговы раз адчуць вялікую любоў Хрыста, а таксама ласкавасць і шчодрасць Нябеснай Матулі.
