Улетку Дабрачыннае каталіцкае таарыства Caritas Мінска-Магілёўскай архідыяцэзіі працягвала рэалізацыю праекта Hope — «Надзея», — скіраванага на падтрымку людзей у патрэбе.
Як адзначаецца на старонцы Caritas-Мінск у сацыяльнай сетцы Вк, лета — гэта выдатная пара для пасадкі трускавак. Гэтыя ягады з’яўляюцца рэкардсменам сярод пладовых раслін і першымі даюць гаспадарам магчымасць убачыць вынік працы: ураджай можна атрымаць менш чым праз год. Дзесьці сезон для іх ужо скончыўся, а ў Caritas працягваецца.
Шматдзетныя, апякунскія і няпоўныя сям’і, пенсіянеры і людзі з інваліднасцю мелі магчымасць атрымаць дапамогу ў выглядзе расады трускавак.
Праз сацыяльныя пункты Дабрачыннага каталіцкага таварыства Caritas у Крупках, Магілёве і Мінску «зялёную» падтрымку атрымалі 300 чалавек. На кожную сям’ю — па 10 каліў.
Арганізатары праекта адзначаюць, што без падтрымкі Caritas дыяцэзіі Лінц (Аўстрыя) у іх не атрымалася б дапамагчы такой колькасці людзей.
Супрацоўнікі і валанцёры Caritas-Мінск вераць, што праект Hope — перш за ўсё пра добрыя традыцыі, якія ўвойдуць у кожны дом.
