У нядзелю 4 жніўня ў парафіі святога Уладзіслава ў Віцебску, дзе нясуць служэнне манахі з Таварыства Езуса, адбыўся фэст у гонар святога Ігнацыя, заснавальніка езуітаў, тытул якога мае парафіяльны касцёл.
Як паведамляецца на сайце езуітаў у Беларусі Jezuity.by, свята распачалося са святой Імшы, цэлебрацыю якой узначаліў біскуп Віцебскі Алег Буткевіч. У прамоўленай гаміліі іерарх ахарактарызаваў асобу святога Ігнацыя Лаёлы як невыпадковую ў гісторыі Касцёла.
Біскуп заклікаў праз яго заступніцтва прасіць аб ласцы вернасці свайму жыццёваму пакліканню і Касцёлу.
Пасля святой Імшы парафіяне ў невялікай сцэнцы распавялі з гумарам і спевамі аб развіцці сваёй парафіі на працягу мінулага года.
Пачынаючы з восеньскага курса Альфа, у парафіі святога Уладзіслава з’явілася нямала ініцыятываў, у тым ліку біблійныя сустрэчы, групкі «12 крокаў да жыцця», моладзевая група, група руху «Маці ў малітве».
Да таго ж, пасля велікапосных рэкалекцый у жыццё людзей глыбока ўвайшла ігнацыянская духоўнасць, асабліва практыка штодзённай падзякі ў сем’ях.
Падчас сцэнкі закраналася і тэма мастацтва. Парафіянка Тэрэза Будкевіч распавяла пра сваё падарожжа ў Рым і падзялілася ўражаннямі пра касцёл святога Ігнацыя, які знаходзіцца ў вечным горадзе. Новая карціна з выявай незвычайных роспісаў столі ў тым касцёле сімвалічна яднае віцебскі касцёл святога Ігнацыя з касцёлам у Рыме.
Афіцыйная частка скончылася, і ўсе ахвотныя былі запрошаны на смачны пачастунак, пасля якога гасцей чакаў апошні пункт святочнай праграмы — танцы на свежым паветры.
