З 20 па 27 ліпеня адбылася Трэцяя пешая пілігрымка беларусаў замежжа па маршруце Варшава–Кодэнь–Кастамлоты.
Як і ў папярэднія два разы, пілігрымы за 7 дзён пераадолелі 210 кіламетраў.
Сёлета ў пілігрымцы бралі ўдзел каля 30-і асобаў.
Па дарозе пілігрымаў прымалі мясцовыя парафіі.
Як адзначаецца на сайце Душпастырства беларусаў Польшчы Сatholicby.pl, ужо другі год запар пілігрымка беларусаў замежжа праходзіла пад дэвізам «З Богам да Беларусі». Арганізатарамі пілігрымкі з’яўляюцца душпастырствы беларусаў у Польшчы.
«Кожны з нас разумее, што вырашэнне шмат якіх праблемаў у нашай краіне патрабуе даверу Богу. Ідучы з Варшавы да санктуарыяў на мяжы Беларусі і Польшчы, мы ў нейкім сэнсе ідзем з Богам да Беларусі.
Мы молімся за нашу Айчыну і ўмацаванне хрысціянскіх ідэалаў у нашым народзе», — падкрэсліваюць арганізатары.
