25 ліпеня ў санктуарыі Гродзенскай дыяцэзіі Маці Божай Шкаплернай у Гудагаі (Астравецкі дэканат) памаліліся ў 35-ю гадавіну абвяшчэння першым біскупам у Беларусі пасля Другой сусветнай вайны арцыбіскупа Тадэвуша Кандрусевіча.
Гэтая гістарычная падзея адбылася менавіта тут, у Гудагаі, 25 ліпеня 1989 года.
Цэлебрацыю святой Імшы ў інтэнцыі заслужанага іерараха ўзначаліў пробашч Гудагайскай парафіі і кустаў санктуарыя айцец Аркадзь Куляха OCD.
Падчас сёлетняга Гудагайскага фэсту, адзначаючы 35-годдзе свайго пастырскага служэння, арцыбіскуп Тадэвуш Кандрусевіч ахвяраваў Маці Божай Шкаплернай свой першы біскупскі пярсцёнак.
20 кастрычніка 1989 года ў Ватыканскай базыліцы святога Пятра гэты пярсцёнак усклаў на безыменны палец першага ў пасляваеннай гісторыі Беларусі каталіцкага біскупа святы Папа Ян Павел ІІ, а цяпер ён як каштоўны вотум захоўваецца ў санктуарыі каля цудадзейнага абраза.
