Ужо шостае лета запар Дабрачыннае каталіцкае таварыства Caritas Мінск падтрымлівае гаспадарку сельскіх жыхароў, перадаючы патрабуючым пеўнікаў і курачак.
Як адзначаецца на старонцы Caritas Мінск у сацыяльнай сетцы Вк, гэтая падтрымка рэалізуецца ў межах сацыяльнага праекту Hope («Надзея»), які нязменна карыстаецца вялікім попытам.
Падчас першага ліпеньскага выезду куранят атрымалі жыхары Лагойска, Смалявічаў, Ляскоўкі (Мінскі раён), Заслаўя і Маладзечна. Усяго дапамогу ад Caritas атрымалі 107 чалавек.
Супрацоўнікі і валанцёры Дабрачыннага каталіцкага таварыства вераць, што 1070 гадаванцаў, якія адправіліся ў добрыя рукі, стануць не толькі дапамогай у хатняй гаспадарцы, але і маленькімі сімваламі новага жыцця, надзеі, простай чалавечай радасці.
Партнёрам праекту Hope з’яўляецца Caritas дыяцэзіі Лінца (Аўстрыя).
