11 ліпеня з нагоды юбілею 25-годдзя Віцебскай дыяцэзіі ў Мёрах прайшоў адкрыты турнір па міні-футболе сярод міністрантаў. У спаборніцтвах ўзялі ўдзел чатыры каманды з трох дыяцэзій: Віцебскай, Гродзенскай і Мінска-Магілёўскай архідыяцэзіі.
Як паведамляецца на сайце парафіі Унебаўзяцця Найсвяцейшай Панны Марыі ў Мёрах Kascelmery.by, узяць удзел у спаборніцтвах акрамя гаспадароў пажадалі каманды міністрантаў з Глыбокага (Віцебская дыяцэзія), Гервятаў (Гродзенская дыяцэзія) і Маладзечна (Мінска-Магілёўская архідыяцэзія).
Праграма турніру распачалася ў мёрскім касцёле, дзе ўдзельнікаў спаборніцтва прывітаў біскуп Віцебскі Алег Буткевіч.
Пасля супольнай малітвы і благаслаўлення Найсвяцейшым Сакрамантам, краязнаўца Вітольд Ермалёнак пазнаёміў прысутных з гісторыяй парафіі і касцёла ў Мёрах.
Потым адбылася жараб’ёўка каманд, якую правялі біскуп Буткевіч і пробашч парафіі ксёндз Андрэй Кулік. Вызначыўшыся з ходам гульні, усе разам скіраваліся на стадыён Мёрскай сярэдняй школы № 3, дзе ўжо сабраліся гледачы і госці імпрэзы.
Прысутных на спартовай пляцоўцы прывітаў ініцыятар спаборніцтва — вікарый Мёрскай парафіі ксёндз Алег Зямчонак.
Права распачаць турнір і забіць першы гол атрымаў біскуп Алег Буткевіч, якому арганізатары турніру падаравалі адмысловую футболку гульца з першым нумарам.
Пасля таго, як суддзі Алег Грыгаровіч, Андрэй Чарняўскі і Анатолій Заяц нагадалі ўдзельнікам правілы спаборніцтваў, распачаліся матчы паміж камандамі.
Першымі гулялі госці дыяцэзіі — Гервяты і Маладзечна, — якія задалі бадзёры тон спаборніцтву і паказалі даволі высокі ўзровень гульні. Брамнікі старанна выконвалі свае абавязкі і доўгі час лік быў нічыйны. Па выніках двух таймаў перамаглі міністранты з Маладзечна.
Наступнымі на поле выйшлі каманды з Глыбокага і Мёраў. Барацьба была сур’ёзнай. Глыбоцкія міністранты моцна трымалі абарону, аднак перавага была на баку мёрцаў.
Нягледзячы на тое, што ўсе наступныя матчы былі не менш напружанымі, на стадыёне панаваў добразычлівы і радасны настрой.
Гульцы падтрымлівалі адзін аднаго, а гледачы шчыра радаваліся забітаму голу і перажывалі ў выпадку няўдачы.
Гульня была настолькі цікавай, што першы этап спаборніцтва праляцеў незаўважна. Каб падмацаваць сілы перад выніковымі матчамі, удзельнікі спаборніцтва скіраваліся на абед.
Пасля невялікага адпачынку на стадыёне распачалося спаборніцтва за 3-е месца паміж Гервятамі і Глыбокім. Гульня была даволі напружанай. Не абышлося нават без пенальці. У складанай барацьбе перамогу атрымала самая маладая па ўзроставым складзе каманда з Гервятаў.
Усе з хваляваннем чакалі фіналу. Каманды з Мёраў і Маладзечна не падвялі гледачоў і прадэманстравалі свае лепшыя здольнасці.
Абедзве каманды гулялі дакладна і зладжана, аднак па выніках двух таймаў перамаглі гаспадары турніру.
Гульня завяршылася, і настаў хвалюючы момант падвядзення вынікаў. Бронзавыя медалі ў Першым адкрытым турніры Віцебскай дыяцэзіі па міні-футболе здабыла каманда міністрантаў з парафіі Найсвяцейшай Тройцы ў Гервятах, а срэбраныя — каманда міністрантаў з парафіі святога Казіміра ў Маладзечне. Залатыя медалі і кубак турніру атрымалі гаспадары спаборніцтва — каманда міністрантаў з парафіі Унебаўзяцця Найсвяцейшай Панны Марыі ў Мёрах. Усе ўдзельнікі спаборніцтва атрымалі дыпломы і падарункі, спонсарам якіх стала Дабрачыннае каталіцкае таварыства Caritas Беларусь на чале з яго дырэктарам ксяндзом канонікам Андрэем Аніскевічам.
Падчас турніру міністранты спаборнічалі не толькі на футбольным полі, але і прадэманстравалі свае здольнасці ў веданні літургіі і Святога Пісання. Лепшымі ў конкурсе літургічных і біблійных ведаў сталі міністранты з Глыбокага, другое месца — Мёры, трэцяе — Маладзечна.
Арганізатары спаборніцтва выказваюць словы ўдзячнасці Caritas Беларусь, адміністрацыі Мёрскай сярэдняй школы № 3 і ўсім валанцёрам за дапамогу ў правядзенні турніру па міні-футболе.
